Gobernador a haci entrega di Copa Hubenil Gobernador Felipe B. Tromp

ORANJESTAD (AAN): Dialuna mainta durante acto protocolar riba Dia di Rey, teni den Wilhelmina Park, Gobernador Alfonso Boekhoudt a

haci entrega di Copa Hubenil Gobernador Felipe B. Tromp na e ganadornan di e aña aki.

   E hobennan Randerly Trimon den categoria Hubenil y Ji-Zion Boekhoudt den categoria Pre-Hubenil a ricibi e prestigioso Copa (Pre) Hubenil Gobernador Felipe B. Tromp 2026. E reconocemento aki ta wordo duna pa nan logronan sobresaliente riba tereno social y deportivo.

   Den categoria Hubenil, e premio ta bay pa Randerly Trimon, un hoben di 19 aña cu a destaca pa su dedicacion, actitud positivo y su compromiso constante pa yuda, motiva y inspira otronan, hopi biaha riba base boluntario. Randerly ta miembro activo di e organizacion Believe in Yourself y anualmente e ta fungi como lider den diferente vakantiekampnan y actividadnan di organizacionnan.

   Den categoria Pre-Hubenil, e premio ta bay pa Ji-Zion Boekhoudt, un hoben atleta kende a demostra perseverancia, dedicacion y compromiso extraordinario den deporte di coremento. Ji-Zion, miembro di Eagle Runners, ta practica atletismo for di cuatro aña y, a pesar di a enfrenta un lesion cu tabata stroba su progreso, el no a laga esey detene dje. Contrario na esey, el a continua contribui como boluntario na caredanan y caminatanan, apoyando organizacionnan manera IBiSA, Patrishi Sports y su propio team cu trabaonan logistico y registro digital di participantenan.

   Durante aña 2025, Ji-Zion a representa Aruba tres biaha den exterior. Na Miami el a logra su mehor marcanan personal, na Orlando el a gana prome luga den 400 meter sprint y di cinco luga den 200 meter sprint, y na Corsou el a logra prome luga den 60 meter sprint y 400 meter sprint. E ta tambe un miembro activo di Alpha Runners. Na december 2025, Ji-Zion a ricibi e premio di Year End National Ranking den su categoria, organiza pa Patrishi Sports. Su perseverancia y determinacion a haci cu el no solamente supera obstaculonan personal, pero tambe hiba nomber di Aruba cu orguyo riba nivel internacional.

     Ademas di e reconocementonan principal, e Copa Hubenil Gobernador Felipe B. Tromp ta otorga anualmente tambe diferente premionan di estimulo. E meta di e reconocemento aki ta pa stimula hobenan pa sigui desaroya nan talento y compromesonan riba tereno social, cultural y deportivo.  Premio di Estimulo a bay pa Stephanie Quant, Dyon Courtar, Angelly Laclé, y e rumannan Z-Nirich y Z-Zirich Gomez.