Paula Andrea Acosta instala como Miss Teen Mundial Aruba 2026

Beyesa hubenil instala Diasabra anochi

ORANJESTAD (AAN): Un multitud grandi di persona tabata presente Diasabra anochi na e establecimento di SharQy’s den Harbour House na Playa, pa presencia e momento cu e organizacion di Miss Youth Aruba, a instala e dama hoben Paula Andrea Acosta como ‘Miss Teen Mundial Aruba 2026’.

   Paula Andrea a wordo instala cu su sjerp door di e simpatica Jennely Winklaar, kende ta e Miss Teen Mundial Aruba 2025.

   Paula Andrea tin 16 aña di edad y e ta bishitando Aruba Adventist Academy.  A bin compronde cu e tin varios luna caba ta preparando pa bay representa Aruba na e certamen di Miss Teen Mundial na luna di Juni.  E certamen aki ta uno di esnan mas grandi di damanan hoben, y lo bay ta na El Salvador.

   Ora e MC di anochi, Jahee Bikker a puntra Paula Andrea con e preparacion ta pa El Salvador, el a splica cu preparacion ta encera training di su forma di papia, su curpa, y esaki ta yud’e pa tin hopi mas confianza den su mes.

   El a splica cu e corona cu el a haya anteriormente como ganadora maximo di Miss Youth Aruba 2025, ta uno cu a yude cambia bastante, y cu e no ta djis un titulo.  Pasobra na caminda el a siña con pa stima su mes, pesey e ta indica cu Aruba ta bayendo hopi bon prepara pa El Salvador!