Inspector Roselynn Angela ta remarca:
ORANJESTAD (AAN)-- Señora Roselynn Angela, Inspector di Departamento di Inspeccion di Remedi, a splica den entrevista cu Matutino DIARIO, kico ta haci cu un remedi ta ilegal, aki na Aruba.
El a bisa cu por mira esaki di diferente angulo. Na prome lugar tin cu wak con e producto a wordo traha.
“Hopi biaha e productonan ta wordo traha den un cushina of un camber di cas, of un lugar antihigienico cu por trece cierto riesgonan pa e pashent si e remedi mes ta contamina.
“Vooral si bo ta bay inyect’e, e remedi ta drenta directamente, unda cu e riesgo pa e persona cu ta bay hay’e, ta mas severo. E por haya un sepsis si tin bacteria, tin di dje cu ta crece si ta inyecta bo, bo por haya un infeccion y di e infeccion ey bo por muri tambe, si e no wordo trata”, Inspector Angela a señala.
El a bisa cu e no tin informacion ni ta registra cu na Aruba por tabata tin un caso asina, pero e producto ta wordo prohibi pasobra e no ta di fabrica. “Door cu e no ta wordo traha den fabrica e calidad no ta wordo traha pa e mercado di Aruba, y no tin cu warda pa un hende fayece, of ‘p’e baca hoga’ pa tuma accion.
“Mi por specifica tambe cu tur e reglamentonan tocante di remedi a bin, pasobra den pasado algo a sosode. P’esey e reglamento di remedi t’asina estricto, cu bo tin cu trah’e den un bon condicion, e mester ta higienico, mester ta un producto di bon calidad. Si no, e por trece cierto riesgonan pa e persona.
“Si bo tin un malesa y bo ta haya un producto ilegal, si e ta traha den un fabrica y e producto ta awa solamente, abo cu bo malesa no ta wordo yuda, anto bo ta muri tambe di e malesa cu bo tin”, Inspector señora Angela a reitera.
Pesey tin asina hopi regulacion cu bo tin cu prueba cu e remedi ey ta efectivo pa trata e malesa cu bo tin”, el a remarca.
E remedi mester ta traha na cierto calidad y esey ta wordo verifica door di controla e fabrica, y con e ta bay di e fabrica te con e ta drenta e pais y con e ta wordo aplica na e persona. “Tur esaki mester garantiza cu e producto ta di un calidad hopi halto pa e persona haya e remedi cu e tin cu haya. Esey ta ora cu e ta legal, bo tin e garantia cu e remedi cu bo haya ta un bon remedi”, señora Angela a subraya.
