Gobernador a bishita edificio renoba di Utilities Group

ORANJESTAD (AAN): Recientemente Gobernador Alfonso Boekhoudt a bishita e edificio nobo di oficina di Utilities Group na Italiëstraat na Oranjestad.

   Durante e bishita aki, Sr. Joseph Everon, Managing Director di Utilities Aruba N.V., a duna un presentacion na nomber di tur e miembronan di directiva presente di Utilities Group tocante e progreso cu ta wordo haci den e transicion energetico na Aruba.

   E transicion aki a ricibi un impulso significante danki na e subsidio maximo di 53 miyon euro cu gobierno Hulandes a pone disponibel pa inversionnan den conexionnan di e red, refuerso di e red y tambe den deposito di energia den baterianan.

   Tanto WEB Aruba N.V., N.V. Elmar, AWSS N.V. y Utilities Aruba N.V. ta forma hunto e Utilities Group.  E potretnan ta duna un impresion di e bishita, y ta cortesia di Kabinet Gouverneur Aruba.