Den cuadro di Dia Mundial di Alimentacion
ORANJESTAD (AAN): Innovacion den agricultura ta habri mas oportunidad pa ciudadanonan produci nan propio alimento y contribui na desaroyo di e sector primario na Aruba. Asina Randy Maduro di Departamento di Agricultura, Cria y Pesca, Santa Rosa, a indica den un entrevista reciente relaciona cu Dia Mundial di Alimentacion, cu ta wordo conmemora dia 16 di october.
Maduro a destaca cu, durante su 50 aña di existencia, Santa Rosa a traha pa sostene agricultornan, criadornan y piscadornan, y stimula ciudadanonan pa desaroya iniciativanan propio. Den e ultimo añanan, metodonan manera aquaponics y hydroponics a amplia e posibilidadnan pa produccion local.
Relaciona cu e tema presenta pa e aña aki, “Innova pa por tin algo di come mañan”, Maduro a enfatisa e importancia di sigui siña y aplica metodonan cu por contribui na futuro di produccion di alimento. Santa Rosa ta sigui brinda apoyo na iniciativanan cu ta fortalece e sector primario.
Segun Maduro, Aruba ta mas conscientisa tocante e importancia di come saludabel. Den e sentido aki, Santa Rosa ta encurasha ciudadanonan, incluyendo muchanan di scol, pa cuminsa cu un proyecto chikito den cura di cas. Un espacio dedica na cultivo di tomati, selder, promenton, lechuga of fruta por ta un prome paso pa produci alimento pa propio consumo, sea den tera of cu un metodo innovativo.
Sin embargo, acceso na awa ta sigui ta un di e retonan mas grandi pa agricultura. Maduro a splica cu Santa Rosa, hunto cu gobierno, a busca solucionnan pa beneficia e sector. Den e cuadro aki, el a menciona palabracionnan cu WEB pa personanan di mas cu 60 aña por bin na remarke pa un meter di awa cu un tarifa special pa uzo agricola.
Santa Rosa ta ofrece tambe cursonan pa amplia conocemento tocante cultivo y metodonan innovativo. Maduro a señala cu hydroponics ta un opcion importante pa futuro, aunke su aplicacion ta rekeri conocemento y preparacion.
E interes den e metodonan aki, tambe entre hobennan, ta grandi, segun Maduro. Esaki ta brinda oportunidad pa sigui desaroya agricultura local y envolve un generacion nobo den produccion di alimento.
Maduro a agrega cu Santa Rosa tin otro plannan den desaroyo, cu lo wordo anuncia na su debido tempo.
