Gino Goeloe, Fraccion Futuro:
- No ta polis sino Crisis Team di Respaldo ta e prome yama pa atende
ORANJESTAD (AAN)-- Parlamentario Gino Goeloe, di fraccion di partido Futuro, den entrevista cu DIARIO, a duna di conoce cu Diamars su fraccion enberdad a sinta cu Sindicato di Polis (SPA), den un Comision, porta cera.
“Eynan a bin padilanti cu e problema di salud mental den nos comunidad, ta aumentando. Esaki ta algo cu enberdad den diferente entrevista mi a bisa cu nos tin cu takel e problema aki, y con nos ta tekel’e? Door di traha hunto. Den e caso aki, nos tin Stichting Respaldo y Fundacion Hunto, cada ken tin nan tereno berdad, pero nos tin cu traha hunto. Locual cu ta pasando actualmente, segun mi a compronde, tin casonan Sikiatrico, pero alavez cu adiccion. Dus, e ta un mezcla di un persona cu ta sufri di adiccion cu schizophrenia” Gino Goeloe a señala, agregando cu esey ta hopi peligroso, pasobra ora un di e personanan aki uza droga, esey por ta marihuana, cocaina, base, nan ta bay den alucinacion, nan ta cuminza wak cosnan cu no tey, tende stem, y ora nan ta cuminza alucina e ora ey nan ta bira agresivo.
“Anto p’esey, berdad polis no ta e persona cu ta wordo ‘opgelegd’ pa casonan asina aki.
Pesey tin un Crisis Team, cu tin na Respaldo, cu nan ta e prome yama pa bay atende den e casonan aki. Locual mi a compronde ta cu e Crisis Team aki, no ta yega na e casnan ora cu nan wordo yama, y esey ta algo cu nos tin cu sinta awo cu Respaldo pa cual berdad kico ta e problema y di con no ta yega na e casnan, pasobra e intencion ta cu nan ta yega na e casnan, ta evalua e caso aki, y polis ta wordo yama pa reforza ora cu e caso por bay foi man”, Parlamentario Goeloe a indica.
El a sigui splica cu hopi biaha loke por pasa ta cu ora e polisnan ta bin uniforma, ta afecta e pashent cu ta den su agresividad y den e caso e ta wak cos cu no tey, ta tende stem, e ta paranoico, y ora e ta wak uniform, nan ta reacciona riba e uniform. Esey ta cosnan cu Goeloe ta kere cu tin cu bay papia seriamente con nan ta bay maneha e problema aki.
“Pero, atrobe, mi ta kere cu e prome yama ta e Crisis Team, di Stichting Repaldo”, Gino Goeloe, Parlamentario di fraccion Futuro, a reitera.
