GKMB ta haci su best pa atende cu yamada pero pueblo mester actua y no laga awa para den cura  

Luis Chong:

ORANJESTAD(AAN): Den un entrevista cu DIARIO, director di Gele Koorts Muskiet Bestrijding (GKMB) Luis Chong a duna di conoce cu GKMB ta hayando hopi yamada for di comunidad cu nan ta sinti basta molester di sangura.

“Mirando e cantidad di yobida cu nos a haya den ultimo simannan, nos por a premira cu esaki lo sosode”.

Esaki tambe debi na e hecho cu hopi hende despues di e yobida no ta tene nan cura limpi debidamente.

Hopi hende ta coi awa den hemchi, bari etc. pa muha mata y despues di 1 of 2 siman ta bin un brote grandi den e barionan, segun Chong.

El a splica cu ora cu GKMB haya yamada y bay haci un control na e casnan, e trahadornan ta ripara por ehempel cu tin awa para den bleki of tire bieu, cu ta perfecto pa cria sangura.

“Nos ta haciendo nos best pa atende e yamadanan, pasobra nos no kier laga ningun hende den e problema”.

Sinembargo e idea no ta pa nos bin haci cura di hende limpi, sino e hendenan mes mester percura pa esaki, segun e director, cu ta haci un yamada na tur hende pa cana rond di cas y check di tin awa para cierto caminda.

“Si bo tin tire den bo cura, por fabor pone esakinan den un parti seco di cura, bao di dak of den garage, pasobra di e tire coi awa bo tin un criadero den bo cura, segun Chong.