A rechaza peticion pa interoga Promer Minister
ORANJESTAD (AAN): Diahuebs mainta, e Hues cu a bin Aruba special pa atende cu caso Flamingo, a tuma decision den e serie di peticionnan cu e abogadonan a haci Dialuna 6 November 2023 den e “regie zitting”. E intension di e “regie zitting” ta pa abogadonan por pidi investigacionnan cu nan ta desea pa haci, promer cu Hues fiha un fecha pa cuminsa trata caso Flamingo.
Den sala di Corte tabata presente Otmar Oduber, su yiu Jeandrick Oduber, Eisia Esser, Richinella Wever Croes y Laurence Phillips.
Rechaza peticion pa pospone caso: Ta asina cu abogado mr. Carlo y abogado mr. D. Croes, dialuna a bisa Hues cu nan no a haya suficiente tempo pa studia tur e documentonan. Nan a pidi pa pospone e “regie zitting” y bin cu un di dos “regie zitting” pa asina nan por tin un mihor bista kendenan tur nan kier pa worde interoga door di Hues Comisario. Asina mes e abogadonan a menciona un cantidad di personanan cu nan kier pa worde interoga.
Hues a cuminsa cu Otmar Oduber y a mustra cu Otmar a worde interoga 10 biaha y abogado mester ta na altura di tur informacionnan. Hues a rechaza e peticion pa pospone e caso. Pa loke ta e peticion pa interoga un cantidad di testigonan, Hues ta haya cu ta na beneficio di e defensa pa scucha testigonan. El a aproba pa scucha 30 testigo cu ta encera entre otro funcionarionan di DIP y algun agente di e team investigador. Tambe den e testigonan tin algun di e sospechosonan di caso Flamingo.
Aproba peticion pa scucha Marisol Tromp: Pa cu e peticion pa scucha e agentenan di investigacion, Hues a rechaza esaki. Pero Hues a aproba e peticion pa interoga Marisol Tromp.
E otro testigonan lo worde rechaza. Hues ta haya cu esaki no ta perhudica Otmar den su defensa.
Hues a aproba e peticion di Esser y Phillip pa scucha Marisol Tromp.
Rechaza pa scucha Promer Minister: Den e asunto di “spook ambtenaar”, Hues a rechaza e peticion pa scucha e mandatarionan Wever Croes, Croes y Oduber.
Hues a mustra cu segun Otmar, tin palabracion politico. Pero segun declaracion di Hans Geerman, e no tabata traha pa Minister President sino Otmar Oduber. Hues a rechaza tambe e peticion di Esser y Phillip pa scucha Promer Minister Wever Croes.
Aproba pa scucha testigonan: Hues a sigui bisa cu e ta aproba pa scucha 9 testigo di e peticionnan cu mr. D. Croes a haci.
Hues a rechaza e peticion di mr. Odor pa laga psycologo y psychiater evalua e estado mental di Wever Croes durante e periodo cu e ta worde acusa. Hues a bisa cu e lo ordena pa Reclasering traha un raport. Hues a aproba 5 testigo, di e peticionnan di mr. Odor pa worde interoga na Hues Comisario.
Hues a aproba e peticion di Jeandrick Oduber, pa scucha 3 testigo.
Hues a aproba e peticion di Phillips, pa scucha Marisol Tromp pero a rechaza e peticion pa scucha Promer Minister.
Caso posponi pa tempo indefini: Promer cu a caba cu su decision, Hues a bisa cu e por imagina cu despues di scucha testigonan, abogado(nan) lo kier scucha mas testigo. Hues a bisa cu e abogadonan lo por pidi Hues Comisario y Hues Comisario lo consulta cu Hues.
Hues lo evalua si ta haci mas interogacion of no.
Hues a pospone e caso pa tempo indefini pa asina duna Hues Comisario tur tempo pa scucha e testigonan y laga Reclassering traha e raport.
