‘Mi no sa e motibo tras di e comunicado’
ORANJESTAD(AAN): Recientemente den un entrevista cu DIARIO Minister Ursell Arends a papia tocante e kehonan di Stichting Parkietenbos, unda cu el a splica cu na 2022 el a haya un carta for di e fundacion y el a atende cu nan peticion, unda cu el a bishita e bario y a duna un presentacion riba kico ta e pasonan cu su ministerio ta bay tuma.
“E aña aki mi a haya un di dos carta for di nan den cual nan ta bisa cu nan ta bay den bezwaar cu e ‘hindervergunning’ cu ta den proceso pa nos pro sanea e dump di Parkietenbos”.
Mi kier aclarea esaki mesora y mi ta haya lastima cu e discusion aki ta andando den prensa, mirando cu Stichting Parkietenbos a wordo invita tambe door di Ecotech pa cana riba e tereno di Sero Teishi.
DNM cu ta traha bao di mi ministerio ta haci sondeo constantemente y ta dunami conseho riba kico pa haci.
Nan ta midi calidad di aire entre otro, pa si tin cualkier problema nan por atende cune di biaha y te dia di awe mi no a haya ningun informacion cu lo tin un problema eynan, segun e mandatario.
Arends a bisa si cu Stichting Parkietenbos ta boga pa mas incinerator y cu e habitantenan ta bisa cu nan no kier mas incinerator.
“Mi no sa e motibo tras di e comunicado di prensa ta y te hasta mi a invita e Stichting pa participa den e proyecto di ‘Trash to Cash’, pero nan a nenga esaki y a bisa cu nan kier keda independiente, pasobra nan kier sigui den nan rol”.
Pa varios decada nos a tene e bario di Mahuma, Parkietenbos, Simeon Antonio, Bucutiweg y Cas di Paloma secuestra y awor cu tin un alivio y e dump no ta kima mas, ainda nos no ta cla.
Nos tin cu sanea e area aki y esey ta cuminza den transcurso di otro aña, segun e minister.
