Giselle Department Store celebrando awe 40 aniversario

ORANJESTAD (AAN): Giselle Department Store ta celebra awe Diahuebs, su di 40 aniversario!  Pues ta hopi tempo caba cu yen felicidad nan ta sirbiendo pueblo di Aruba, cu a duna nan e confianza pa ta e pacus number 1 di Aruba.

   “Nos ta hopi agradecido na tur nos clientenan cu a duna nos apoyo y sosten durante 40 aña,” gerencia di Giselle a declara na DIARIO.  “Masha masha danki pa e confianza”.

   “Na nos personal di nos cu nos ta considera famia di Giselle, masha danki y nos ta aprecia tur nan esfuerzo,” gerente a indica.

   E satisfaction grandi di nan ta cu di e 30 personanan cu ta trahando cu e compania, mas di mitar tin riba di 15, 20, y hasta 25 aña di servicio.  E personal di Giselle Department Store e momento aki ta conta cu 29 hende muher y un hende homber.

   Giselle a habri su portanan riba un Diaranson 26 Augustus 1981 como un eenmanszaak Arubiano, cu 3 persona den servicio.  Pues nan tabatin Deta como bendedora, Evelina como cahera y Elsie (den feliz memoria) como Manager.  Na aña 1984, Giselle a bira un N.V.

   Giselle a cuminsa relativamente hopi chiquito. Cu bendicion di Dios nan a cuminsa cu e promer expansion na 1984, y tambe mas expansion cu a sigui na 1990, 1995 y el ultimo na 2001 cu tabata un inversion basta grandi.

   DIARIO ta na altura, cu Giselle tur aña ta haci hopi donacion na varios instancia sin tin di haci propaganda cune. Giselle su lema semper ta loke man drechi haci, e man robez no mester sa.

   Formidable si ta cu den e 40 aña di existencia, Giselle a organiza varios actividad cu su empleadonan, e.o un viahe completo pa bay bishita Curaçao, Bonaire y Puerto Rico pa un dia.

   Tambe nan a yega di organiza eventonan manera Bingo, speurtocht, Hersengymnastiek, come na Restaurant, Bustour, bishita De Palm Island, bay wak luz den December. “Semper nos a haya hopi bon coperacion di nos famia.”

   DIARIO ta felicita Giselle Department Store cu e logro grandi aki!  Claro, ta di spera cu pueblo di Aruba lo sigui duna nan e sosten!  Un pacus unda bo ta haya tur cos.

   Giselle Department Store ta situa na Noord, riba e caminda di Rotonde Noord pa Turibana.