Premier Wever-Croes ta enfatiza: *Si ta pa spanta of manipula hende pa no vacuna e tabata un mal intencion!
ORANJESTAD (AAN) -- Tocante e manifestacion contra e vacuna, cu tabata tin diadomingo ultimo, cu tabata tin e vacunathon 3.0, Minister Presidente a emiti su opinion al respecto, y a expresa cu sinceramente e no a compronde e intencion di e manifestacion aki.
“Nos ta respeta e decision di cada persona di no vacuna. Pero cada persona mester respeta si e decision di otro cu si kier vacuna. Nos sa cu e vacuna no ta un garantia di 100% di solucion pa tur problema. No tin ni un garantia asina den bida. Pero nos ta weita si, cu e vacuna ta e arma mas cerca cu nos tin awo, pa nos proteha nos mes y esnan cu nos ta stima. Kiermen, esnan cu dicidi cu nan ta bay vacuna, nan tin nan derecho di hacie, y ningun otro hende tin derecho di stroba nan di haci esey”, e mandatario a subraya.
El a enfatiza cu e no a compronde e manifestacion di diadomingo dilanti Ritz Carlton, mucho bon. “Si e tabata un manifestacion pa expresa nan preocupacion cu nan no kier vacuna y cu nan no kier wordo forza pa vacuna, mi por compronde un manifestacion asina. Mi ta lamenta cu e tabata den area di hotel, y cu el a wordo haci dilanti esnan cu si kier a bay vacuna y cu bo por spanta cu un accion asina. Si tin un grupo di hende cu berdad ta preocupa pa nan derecho di no vacuna, wordo viola, tin hopi manera pa expresa esey y diadomingo no tabata e momento ni e lugar pa hacie” e dignatario a señala.
El a agrega cu si nan intencion ta pa spanta of intimida hende pa no bay vacuna, e no ta algo cu ta na su lugar.
“E realidad ta cu hopi pais rond mundo, no Aruba so, ta sufriendo di e efectonan di e pandemia, cu nan tin cu cera scol, cera lugarnan, tin cu bin cu toque de queda, loke ta pone cu na cierto momento e hendenan ta bay pone mas presion riba e vacunacion. Esey por pasa, pero aki na Aruba nos no ta den e punto ey ainda”, e dignatario a remarca.
El a bisa ademas, cu e ta hopi gradici cu e dos mil y pico personanan cu a bay vacuna durante e vacunathon 3.0 na Ritz Carlton. Ainda tin mas cu no a logra bay, pero cu mester yega na nan ainda pa nan bay vacuna. Aruba ta na 71% di vacunacion en general, y gobierno kier yega na 85%. “Pues, esnan cu no kier vacuna, tin suficiente espacio den e 15% cu nos ta tene cuenta cune, cu nan no a vacuna”, Prome Minister a recalca.
