Gateway 2030 ta un proyecto sumamente importante pa pais Aruba

Parlamentario Jennifer Arends-Reyes

ORANJESTAD (AAN):   Recientemente Parlamentario Jennifer Arends-Reyes den calidad di presidente di comision di Turismo hunto cu coleganan Parlamentario a haya un presentacion extenso tocante e fasenan di e proyecto grandi pa cu renovacion y ampliacion di nos aeropuerto nacional titula Gateway 2030.

            Diamars 8 di April fase 1A a bay den funcion caminda cu atrobe un meta grandi pa cu e proyecto aki a bay den funcion. E fase aki ta conta cu un US departure hall nobo, bunita y moderno ekipa cu 'self check-in kiosks'. Tambe a elimina algun stap den maneho di ekipahe cu uzo di innovacion pa asina facilita e experiencia y 'pre-clearance' na Aruba.

            E proyecto riba su mes tin basta aña pa cana ainda prome cu por bisa cu e ta den e fase final y tin remodelacionnan grandi pa tuma lugar ainda. Aeropuerto di Aruba ta practicamente e ader principal di nos Turismo y durante e temporadanan aki di construccion grandi y renovacion e por trece cu ne cu e capacidad di Turismo cu nos por procesa via aeropuerto por ser limita y e ta mes momento un bon oportunidad pa hunto delinea un rumbo pa mantene un Turismo sostenibel y cu nos isla por carga.

            Arends-Reyes kier a gradici e ehecutivonan di AAA pa a comparti un mainta sumamente informativo cu Parlamento y alaves felicita nan hunto cu e team pa cu e gran logro aki pa Aruba.