Kimberly de Cuba FTPH-131:
Kimberly de Cuba, di Fundacion Telefon Pa Hubentud, den entrevista cu Seccion Hubentud den Movecion, a menciona cu tur aña na Luna di April, ta busca boluntarionan nobo, y na luna di Mei nan ta cuminza duna nan training.
“E boluntarionan nos ta yama nan Mentor, pasobra na momento cu bo bira un boluntario cerca nos, bo ta haya un training di diez anochi, den cual bo ta haya 36 module, cu ta encera, por ehemplo, con pa bo hiba un combersacion na telefon, con bo ta hiba un combersacion via chat, y tambe diferente tema cu bo por haya via telefon, por ehemplo: depresion, droga, alcohol, amistad, relacion cu nan mayornan. Pues, e ora ey nos ta busca hendenan cu tin energia y motivacion, y cu tin e interes pa traha cu hoben, di scucha mucha y hoben. Eigenlijk, nos no ta pidi ningun background pasobra e training mes ta capacita e persona pa haci e trabao aki”, Kimberly de Cuba a señala.
Kimberly a agrega cu esaki ta e rol di mas importante pa 131, pasobra e ta conoci pa scucha mucha y hoben, y esey ta locual e persona lo haci como Mentor.
“Tambe ta importante pa menciona cu antes tabata solamente Aruba, pero e ultimo tres añanan aki, nos ta brindando asistencia na e Islanan Bonaire, St. Statius y Saba. E tempo cu e boluntario ta duna ta dos ora pa siman, mirando cu e servicio cu nos ta dunando ta atardi, di 2 pa 6. Nos tin dos diferente horario cu ta di 1 pa 4 y 4 pa 6”, De Cuba a menciona.
El a señala cu pa loke ta trata e cantidad di contactonan, locual nan ta wak ta e contactonan den su totalidad. Antes, den su totalidad tabata 9 mil contacto, pero despues di e ultimonan añanan aki, despues di Covid, esaki ta subiendo entre 11 mil cu 13 mil contacto. Esaki ta nifica cu nos hobennan mester di hopi atencion, y algo bon pa menciona ta cu awo e mayoria di yamada ta di casonan serio, y no gewoon pa combersa; esakinan a baha hopi.
“Nos ta bezig pa wak un di dos punto di bista, di parti di e hoben y locual cu nos ta scucha cu nan mes ta trece dilanti, ta e salud mental, cu cada biaha e ta birando pa nan mas un challenge”, De Cuba a relata.
El a agrega cu e mayornan, aworaki nan ta pasa hopi ora pafo di cas, unda cu e mucha y hoben no tin supervision y hopi di nan tin demasiado libertad. “Anto, asina aki no tin control ni supervision di parti di adulto, pa por guia e mucha y e hoben den e bon caminda. Nos ta traha hopi amplio cu diferente organizacion, nos ta comparti e informacion aki tambe cu nan, y nos ta spera cu e no ta keda solamente na comparti informacion, pero cu nan por takel e problema aki, prome cu e bira mas grandi”, Kimberly de Cuba di FTPH a subraya.
