Parlamentario Shailiny Tromp-Lee:
ORANJESTAD (AAN): Diabierna 7 di maart 2025, porfin nos a inicia cu tratamento di presupuesto di Pais Aruba pa aña 2025. Lastimamente na un manera dictatorial esaki a keda geschors te cu previo aviso. Sigur mirando e situacion di traspaso di Gabinete Wever-Croes pa e Gabinete Eman-Croes (dos cabes) mi ta haya necesario pa enfatisa e hecho cu Gabinete Wever-Croes desde un principio a traha duro pa yega na un disciplina presupuestario necesario y a sa di maneha e pais aki responsablemente.
Ya pa di 3 aña consecutivo nan ta entrega presupuesto di pais Aruba na tempo y mesun importante nan ta cumpli cu tur normanan stipula pa ley!
Poco poco e ciclo presupuestario lo keda optimalisa y nos por cuminsa draai manera mester ta. Nos no ta unda nos mester ta pero sigur nos ta riba un bon y mihor caminda. Pesey mes mi ta spera cu e Gobierno nobo sigui mantene e disciplina presupuestario aki caminda ta presenta presupuesto na tempo, ta informa Parlamento mediante voor- y najaarsnota di desaroyonan y ta pidi aprobacion pa cambio na tempo, y caminda tussentijds, esta despues di e prome 6 luna di aña, Gobierno ta bin duna cuenta na parlamento.
Nos mester preveni situacionnan cu a tuma lugar entre 2010 y 2016 caminda nos a conoce hopi situacion caminda e budgetrecht di Parlamento a keda mina, a crea deficitnan astronomico cu Parlamento achteraf tabata aproba. For di Rapportnan di ARA sigur nos por conclui cu hopi cos a bay robes durante e periodo ey sin cu Parlamento tabata informa of involucra. Proyectonan cu a expone pais Aruba na hopi riesgo, cu no a keda cubri responsablemente y caminda cu ARA a conclui cu tabatin hopi eror a keda constata. Proyectonan caminda hopi documentonan ta incompleto y sigur e parti mas crucial ta cu Gobierno di Mike Eman no a bisa ta con pueblo lo bay paga nan.
Nos no por drecha mas loke a bay robes, pero si nos tin den nos man pa preveni cu e mesun erornan di Gabinete Mike Eman I y II ta keda cometi den futuro. Erornan cu a demostra di tin consecuencianan drastico pa nos pais y nos hendenan pa decadanan. Pesey mes ta hopi importante pa Parlamento percura cu Gobierno ta sigui traha segun e recomendacionnan di ARA pa asina nos por percura pa enberdad nos por cumpli cu nos trabou y representa nos pueblo dignamente. Alabes nos mester keda controla cu nos finansas ta keda maneha responsablemente y cu e espacio financiero crea pa Gabinete Wever-Croes keda uza responsablemente y den balans cu e necesidadnan di pueblo.
Gabinete Wever-Croes sigur a percura pa hiba un maneho responsabel cu awe a crea e espacio financiero necesario pa por cuminsa duna bek na pueblo y aunke siendo demisionario asina mes a cuminsa duna bek den e margen di loke ta posibel. Mi kier termina subrayando cu ta danki na e espacio financiero crea pa Gabinete Wever-Croes, Gobierno Eman-Croes tin placa pa inverti y por duna bek na pueblo. Contrario na con nan a laga e caha atras na 2017!
