Gamma IT Solutions ta celebra su di 40 aniversario

ORANJESTAD (AAN): Diabierna, 2 oktober, Gamma IT Solutions a celebra nan di 40 aniversario conhuntamente cu nan famia,

amigonan, clientenan y partners. E celebracion a tuma lugar den nan edificio unda e anochi tabata yen di ambiente cu musica, snacks y bebida pa marca e 40 aña di existencia.

Gamma IT Solutions ta e compania desaroyador di software conoci manera Payroll Pro HRM, RADEX BCMS, RxPro, ED Card entre otro. Gamma IT Solutions ta sumamente orguyoso di ta un compania local cu ta exporta software pa 10 mercado den Caribe y Sur America. E anochi aki a wordo organisa pa comparti y gradici na tur esnan cu di un of otro forma a contribui na e exito di Gamma IT Solutions durante 40 aña largo.

Palabranan di danki ta bai na esnan cu a yuda haci e anochi aki posibel esta e ekipo di DnD Events pa organisa e evento, Endeavor Catering pa e dushi snacks, SK Click Events pa e photobooth, DJ Edje pa pone ambiente cu dushi musica y The Vision of Me Media pa e bunita potretnan.

Frank Baks, Director di Gamma IT Solutions ta comenta “Nos a pasa un anochi hopi ameno y sigur nos kier duna danki na tur cu a bin celebra e ocasion special aki cu nos.”