DVG ta promove caminata pa apoya Fundashon Movimento Ta Bida durante expo

Dahariana Evertsz di DVG:

ORANJESTAD (AAN): Move pa bo salud y contribui na un bon causa: esey ta e invitacion pa e caminata cu Fundashon Movimento Ta Bida lo organiza diasabra, 17 di october 2026, como parti di Expo Promove Salud y Bienestar di DVG.

   E caminata lo sali 5:30’or di atardi for di DVG na Oranjestad y lo finalisa na e mesun lugar pa 6:30 di atardi. E actividad tin como meta pa stimula comunidad pa ta activo, mientras e fondonan recauda lo bay directamente pa Fundashon Movemiento Ta Bida.

   Den un entrevista cu DIARIO, Dahariana Evertsz di DVG a indica cu e caminata ta forma parti di e programa pa promove salud fisico y bienestar. E fundacion ta conoci pa su caminatanan di diasabra y su trabao pa motiva hende pa move.

   Tin dos manera pa inscribi. Personanan interesa por haci un transferencia bancario directamente pa e fundacion, siguiendo e informacion publica riba e plataformanan di social media di Fundashon Movemiento Ta Bida y DVG. Despues, nan mester presenta prueba di pago na e fundacion pa ricibi nan materialnan pa e caminata, cu ta inclui un T-shirt dedica na e actividad.

   Tambe por inscribi  na e sede di e fundacion, situa na IBiSA. Esnan cu kier move, pero no ta participa na e caminata, lo tin otro oportunidadnan pa ta activo. Na clausura di e caminata lo tin un grupo di Tai Chi, mientras Milliard Academy lo ofrece otro actividadnan.

   E Expo lo tuma lugar na e parkeo di DVG, riba Caya ing. Roland Lacle (e caminda antes conoci como Hospitaalstraat). Ademas di movimento, bishitantenan lo por haya informacion tocante nutricion, salud mental, salud oral y diferente tema di prevencion.

   Pa detayenan di inscripcion y pago, consulta e plataformanan di social media di DVG y Fundashon Movemiento Ta Bida.