Futuro profesionalnan culinario di EPI y EPB a participa na workshop exitoso di arte di cushinamento

ORANJESTAD (AAN): E siman di ‘Autentico Aruba Culinary Festival’ a cuminza na Aruba.

  Algo bunita pa mira, ta con Aruba Tourism Authority (ATA) ta colabora cu e industria di F&B na Aruba, pa impulsa y stimula artenan culinario riba e isla.

   Como parti di nan campaña promocional y branding pa Aruba por posiciona su mes como un destinacion culinario nobo pa e mercado ‘niche’ di amantenan di gastronomia cu ta viahando rond mundo.  E esfuerzonan di ‘Autentico Aruba Culinary Festival’ a cuminza Diabierna 10 di October 2025 cu un tayer pa studiantenan di arte culinario na Colegio EPI den e programanan di Empleo Inmediato (IE), Aprendizahe (AP), y esun nobo Certified Culinarian (CC) como tambe EPB Oranjestad y EPB San Nicolas.  El a wordo organiza hunto cu The St. Regis Aruba Resort y varios chef y sommelier famoso di Aruba.

   E meta principal tabata pa stimula e sector aki di e industria turistico y mustra e studiantenan e oportunidadnan profesional den veld di Food and Beverage, unda actualmente tin un demanda grandi pa personal profesional di cushina.  Cada orador a trece informacion balioso pa alumnonan, incluyendo chef Aldwin Donata (Executive Chef Holiday Inn Aruba), tambe Lorraine Cooyman kende a papia di uzo di mata, berdura, y fruta fresco di hardin.  Interesante tabata Zaida Everon, kende ta Bread Sommelier.  A papia tambe Jessika Theysen kende ta Wine Sommelier.  Na final tabatin demostracion final di Jean Claude Werleman (Executive Chef di Terra Restaurant) kende a horna un postre e ora ey dilanti nan tur.

   Un mainta sigur balioso den tur sentido di palabra.