Directiva nobo di Kiwanis Club of San Nicolas a sinta cu yen energia y vision nobo

Mensahe elocuente di president nobo Endrah Richardson-Gumbs

ORANJESTAD (AAN): Recientemente e Directiva nobo di aña 2025-2026 di Kiwanis Club of San Nicolas a sinta, y pesey a tene un ceremonia pa cu cambio di directiva.  Na e ocasion aki a manda felicita y gradici e Directiva saliente, y na mesun momento duna bon bini na esun nobo.

   E tabata un anochi yena cu sonrisa, gratitud, y miembronan cu tabata pasa felicita e president nobo Endrah Richardson-Gumbs y tambe vice-president nobo Artaïza Fräser.

   Den su mensahe como president nobo, sra. Endrah Richardson-Gumbs a splica cu den e aña nobo aki Kiwanis Club of San Nicolas no ta bay haci cosnan chikito, pero ta hinca tur nan energia bao di e tema #StepItUp.

   El a bisa esey, debi cu liderato no ta djis asunto di titulo, pero mas bien presenta cu accion.  E ta pa bo yega na un lugar, y crea un impacto unda cu e ta mas importante, pues cerca e muchanan di mundo.

   El a menciona aki ‘comienso nobo, energia nobo, vision nobo’.  E ta mira cu hunto cu su poderoso vicepresident Artaïza Fräser, nan ta riba un mision pa kibra tur zona di comfort.  Tambe sirbi cu balentia y determinacion.  Inspira comunidad pa lidera cu ehempel. Converti e vision den un cambio real.  Imagina loke lo socede si henter comunidad dicidi na dal un paso dilanti, anto hunto.

   Esaki ta e momento cu transformacion ta wordo produci.  Esey ta ora cu luz, oportunidad, y speranza ta extende mas leu cu fronteranan.  Pesey awor president Richardson-Gumbs ta haci yamada na tur hende, sea bo ta miembro di Kiwanis, un amigo di servicio, of djis un hende cu ta kere den poder di comunidad: Uni cu nan.  Sea parti di e viahe aki.  Sea parti di e impacto.

   Esaki ta mas cu un aña nobo di Directiva, esaki ta un movimento.  Ban dal un paso dilanti, pa nos destaca, y sirbi cu balentia.

   Riba combinacion di potret por mira mas di e anochi special aki. Potretnan cortesia di Kiwanis Club of San Nicolas.