Fusion entre FMAA y SPD ta hopi importante pa tackle problemanan di adiccion

ORANJESTAD (AAN): Dialuna Randall van Trigt di Fundacion pa Maneho di Adiccion di Aruba (FMAA) tambe a sinta cu Formador, den e proceso di formacion di e gabinete nobo.

Despues di esaki el a hiba palabra durante un conferencia di prensa.

Segun van Trigt, e reunion a bay bon y cu e ta contento pa wak cu Formador a yama FMAA tambe.

“Adiccion durante varios aña no a haya e atencion cu e tabata tin mester, pero nos a bin cu un vision nobo”.

Manera nos tur sa, e situacion di COVID-19 banda di e crisis di cuido a crea un crisis financiero, cual ta haci tur cos mas dificil ainda.

Pesey nos a dicidi di uni cu SPD, unda cu mundo di Adiccion y mundo di Psiquiatria ta bin hunto, segun van Trigt.

El a sigui bisa cu awendia e dos mundonan aki di berdad hopi biaha ta bin hunto y pesey a papia cu Formador riba un idea integral , unda cu prevencion, psiquiatria y adiccion ta bay ta bao di 1 capa.

“E idea ta pa nos keda cu e posibilidad pa brinda e servicio mas lihe posibel na Aruba, unda no mester tin mas un lista largo di espera”.

Esey ta e vision cu nos kier logra y mi ta kere cu Formador a tumele hopi bon, segun van Trigt.

Dalgis Montalvo di Sociaal Psychiatrische Dienst (SPD) tambe a papia cu Formador y durante e rueda di prensa el a indica cu tabata hopi importante di por a sinta y haya oido di Gobierno, mirando e vision cu nan kier bin cune.

“Nos ta wak cu hopi biaha adiccion y psiquiatria ta cana hunto y ta importante pa nos por tackle e problematica aki, cu pa basta tempo caba no a haya oido suficiente”.

A bin cierto cambio enberdad unda cu SPD a amplia su servicionan cu un kind en jeugd crisis lijn, pero ainda esaki mester wordo reforza y pesey ta importante pa sinta hunto cu FMAA y tambe pa Gobierno por e balor agrega di e fusion aki, segun Montalvo.