ORANJESTAD (AAN): E reunionnan entre Formador y diferente stakeholder a continua henter dia Diamars, unda cu mainta Formador a papia tambe cu e Asociacion di Dentista, cu a wordo representa pa Marielle Ho-Kang-You.
Despues di sinta cu Formador, Ho-Kang-You a bisa cu e reunion a bay hopi bon.
“Nos a sinta den un grupo hopi extenso cu ta inclui candidatonan di partido MEP y RAIZ”.
E tabata un reunion unda cu nos ta bisa cu nos a logra bisa kico ta e puntonan mas importante den nos area di experticio y nos a wordo scucha bon.
Nos tin cu bisa si cu e tabata un reunion hopi cortico y nos tabata tin hopi mas cos cu nos kier a papia riba dje, pero esaki ta e comienzo y nos ta spera cu nos por wordo invita mas biaha pa nos por sinta y papia riba salud oral, cu ta algo hopi importante na Aruba y cu mester haya mas atencion, segun Ho-Kang-You.
Pa loke ta cortamento di gasto den cuido, Ho-Kang-You a indica cu esey ta un preocupacion grandi pa e asociacion di dentista, pasobra gran parti di nos poblacion cu no ta bishita dentista regularmente ta haci uso di AZV.
“Si AZV cay afo, e problemanan ta bay bira mas grandi pasobra e pashentnan no ta bay na e cuido cu nan tin mester di dje”.
Por ehempel, pa bishita un dentista ora cu nan tin un abces pa nan ranca e diente.
Nan ta cana tur otro caminda prome y keda riba antibiotica hopi tempo, prome cu nan haya e cuido necesario(dentista), cu por a pasa for di e prome dia, segun Ho-Kang-You.
El a sigui bisa cu e cuido basal cu no ta un cuido luhoso tin cu keda den e pakete di AZV y cu e ta spera cu esey lo pasa.
Prensa a puntra e representante di e asociacion si tin espacio pa corta mas pa loke ta e gastonan di dentista y el a splica cu no.
Segun Ho-Kang –You, e dentistanan pa alrededor di 20 aña caba ta cobra practicamente e mesun tarifa, siendo cu tur producto y articulo manera handschoen a bira mas caro.
