Fundacion Telefon pa Hubentud Aruba a comparti conocimento na Suecia

ORANJESTAD (AAN): For di 27 di september te cu 29 di september a tuma lugar e di 10 International Consultation of Child Helplines na Stockholm, Suecia.

E cumbre aki mester a tuma lugar na 2020 caba, pero debi na pandemia di Covid-19, esaki no por a tuma lugar. E director di Fundacion Telefon pa Hubentud, James Sneek, a representa Fundacion Telefon pa Hubentud Aruba.

   Na mundo tin mas di 160 liña di ayudo telefonico pa mucha y hoben den mas di 140 pais. Fundacion Telefon pa Hubentud Aruba for di 2003 ta miembro di Child Helpline International cu ta un organisacion di impactonan colectivo. Tambe desde 2019 Fundacion Telefon pa Hubentud Aruba pa medio di su presidente, Errol Zebeda, ta representante di Child Helpline International pa Latino America y Caribe.

   E di 10 International Consultation of Child Helplines a concentra y tabatin como tema Resilience: Children and Child Helplines in times of crisis. Durante e di 10 International Consultation of Child Helplines a pone hopi atencion ariba e dos motibonan cu desde 2020 mas tanto  mucha y hoben a tuma contacto cu e liña di ayudo telefonico pa mucha y hoben tur parti di mundo. Ta trata di salud mental y violencia.

   E di 10 International Consultation of Child Helplines a ser habri pa su Mahestad la Reina Silvia di Suecia. Dr. Najat, Special Representative di Secretario General di Nacionnan Uni riba tema di violencia contra di mucha, tambe a hiba palabra. E programa a inclui e liña di ayudo telefonico pa mucha y hoben di Ucrania cu a duna un presentacion di e situacion actual di mucha y hoben na e pais aki cu ta bibando den un momento di crisis door di e guera cu Rusia.

    Fundacion Telefon pa Hubentud Aruba tambe a duna un presentacion durante e di 10 International Consultation of Child Helplines. Director James Sneek a haya e honor di por a duna un presentacion tocante e diferente Best Practices cu Fundacion Telefon pa Hubentud Aruba ta haci uzo di dje na momento di asisti e muchanan y hobenan di Aruba, St. Eustatius y Saba.  

    Despues di 22 aña di existencia, Fundacion Telefon pa Hubentud Aruba como un ‘Kenniscentrum’ ta exportanando conocimiento na organisacionan gubernamental y no-gubernamental.