Fundacion Salvaguardia e Herencia Cultural a presenta obra “Otro Gay ta canta”

ORANJESTAD (AAN): Fundacion Salvaguardia e Herencia Cultural di Aruba (FSHCA) a presenta e obra “Otro Gay ta canta” riba dia di San Juan,

na Centro di Bario Savaneta. Un obra original cu tema di Dera Gay. Un storia cu ta conta di e transicion di uzo di un gay bibo pa e baile di Dera Gay, pa e uzo di calbas awendia. E obra aki a wordo skirbi y dirigi pa Ferdinand Franca.

Un publico grandi a sa di disfruta di e obra y a keda encanta pa e storia ficticio aki. E obra a conta cu un elenco infantil di mas o menos 35 mucha. Esaki ta un proyecto cu grupo Senguene hunto cu Farpa a desaroya pa asina promove e disciplina di Teatro na Aruba como e Teatro infantil. E obra aki a wordo financia pa Cede Aruba bou di e programa di Let’s Act.

Dia 27 di juni nos di FSHCA lo presenta e obra “Otro Gay ta canta’ un biaha mas na Scol di Arte. Lo tin 2 presentacion, un ta 6 pm y e otro ta 8 pm y entrada lo ta gratis. Bin hunto cu e famia y disfruta di e obra aki y contribui na e desaroyo Teatral na Aruba. Masha danki na Farpa y Cede Aruba pa e sosten financiero y na cada un di boso cu a sostene nos durante tur e añanan y nos promesa ta keda vigente pa sigui salvaguardia nos Arte y Cultura na Aruba pa nos futuro generacionnan.