Minister Wever a reuni cu miembronan di UFA
ORANJESTAD (AAN): Recientemente riba invitacion di United Farmers of Aruba Association (UFA), Minister Wever hunto cu Director di Departamento Landbouw, Veeteelt en Visserij (DLVV), a participa na un reunion di e miembronan di e asociacion. UFA ta un asociacion cu ta representa e interesnan di e agricultornan riba e isla di Aruba y ta enfoca riba mehoracion di practicanan di agricultura, aumento di produccion di cuminda local y desaroya y uzo di metodonan di agricultura sostenibel.
Den un ambiente ameno, Minister Wever a intercambia cu e miembronan di UFA riba diferente topiconan, entre otro e conferencia di Dutch Caribbean Agriculture Livestock and Fisheries (DCALFA) a cu a tuma lugar fin di luna di mei na Sint-Maarten, y a intercambia ideanan y preguntanan alcaso relaciona cu e CariFoodFund, cu ainda mester wordo operacionalisa, e Agri-Innovation Park (AIP) y bareranan cu e agricultornan ta enfrentando.
E CariFoodFund, cu ta e instrumento financiero diseña door di Ministerio di Asuntonan Interior y Relacion di Reino di Hulanda, cu a base di dos metodonan ta stimula y fortalece e sistema di cuminda riba e islanan di Reino. Via e prome metodo e fondo ta stimula agricultornan, piscadonan y empresarionan activo den agricultura via un fondo rotativo directamente, cu tin 18 miyon euro disponibel, y via e segundo metodo, cu tin 6 miyon disponibel, ta consisti di subsidio y contribucion pa e gobierno local di e islanan cu ta dirigi na sostene iniciativanan riba tereno di seguridad di cuminda. Minister Wever a enfatisa pa e agricultornan duna feedback na e organisacion di CariFoodFund pa e structura di e instrumento financiero bira un cu ta realmente asisti efectivamente den e operacionnan empresarial, ademas cu na Aruba tin e Agri-Business Academy programa cu tin fondonan di Gobierno di Aruba ainda disponibel.
Minister Wever tambe a duna un update tocante e Agri-Innovation Park cu ta e proyecto cu lo bin cu e prome kassensysteem moderno den Caribe cu sosten di Gobierno di Aruba. E Agri-Innovation Park ta duna e oportunidad pa agricultornan local pa expande y fortifica nan produccion di fruta y berdura y ta reduci e dependencia di Aruba pa importa cierto producto. Gobierno di Aruba ta inverti pa amplia e uzo y accesibilidad pa tecnologia moderno den sector primario y e AIP ta inclui un fuente di energia solar, un sistema pa almacena awa, instalacion di fertigacion y un sistema di clima cu ta resistente contra di cambio di clima hunto cu un centro di conocemento pa training y estudio. Minister Wever a informa cu e estudionan di diseño tecnico y factibilidad economico a keda cla y cu Gabinete AVP-Futuro ta evaluando e tereno di refineria pa construi e AIP. Minister Wever a enfatisa pa e construccion di AIP ta tene cuenta cu tur ley y regla vigente incluyendo pa haci un evaluacion di impacto ambiental.
Na fin di e encuentro Minister Wever a gradici tur miembro di UFA presente pa nan preguntanan y e dialogo y pa a vocifera e bareranan cu ta wordo encontra den e operacion di nan negoshi, riba cunucu y a informa cu su Ministerio lo sigui involucra agricultornan y piscadonan den e ehecucion di maneho y accion concreto.
