Tradicion di San Juan a yega directamente den bario cu hopi entusiasmo y participacion

ORANJESTAD (AAN): Bushiri y Dakota a biba un ambiente di alegria, musica y tradicion diaranson atardi durante e celebracion di Dia di Dera Gay.

Como parti di e iniciativa “Ban celebra Dia di Dera Gay den bario”, Gobierno di Aruba, den colaboracion cu Comision Celebracion di Dianan Nacional (CCDN) y UNOCA Aruba, a hiba e tradicion di San Juan directamente cerca di comunidad.

E trailer cultural a cuminsa su recorido na Bushiri Complex, unda habitantenan di tur edad a reuni pa disfruta di un programa yen di cultura Arubiano. For di Bushiri, e celebracion a sigui rumbo pa Centro di Bario y Deporte Dakota, unda un cantidad grandi di comunidad tambe a participa activamente den e diferente actividadnan.

Durante e recorido, Grupo Masiduri a presenta e baile tradicional di San Juan, mientras cu Grupo Cariño a percura pa animacion musical. Publico tambe a participa den competencia tradicional manera bulamento di candela, grito di gay, grito di galiña, buscamento di bandera y Dera Gay, creando un ambiente interactivo unda grandi y chikitonan por disfruta hunto.

E entusiasmo di e comunidad tabata evidente durante henter e recorido. Diferente habitantenan a expresa cu e iniciativa di trece Dera Gay directamente den bario ta haci e celebracion mas accesibel y ta fortalece e sentido comunitario. Nan a enfatisa cu e actividad ta duna nos muchanan e oportunidad pa conoce y aprecia un tradicion cu ta forma parti di nos identidad cultural, mientras cu e generacionnan mas grandi por comparti e costumbernan cu nan a hereda. Segun e habitantenan, mantene e tipo di celebracion cerca di cas ta yuda preserva nos herencia cultural y ta stimula mas participacion di comunidad den e tradicionnan nacional.

Gobierno di Aruba ta aprecia e colaboracion di CCDN, UNOCA, e gruponan cultural, e boluntarionan y tur habitante cu a contribui pa haci e prome paradanan di e recorido un exito. E celebracion a sigui su caminda rumbo pa Mabon Kavel y culmina cu un gran final na Carnival Village na San Nicolas, unda a reuni e bario pa celebra nos herencia cultural.