Fundacion Respeta Mi ta duna un impulso nobo na ‘Panda: No ta Mishi’

Stacey Franca encuanto Panda Live Show:

ORANJESTAD (AAN): “Panda: No ta Mishi” ta un proyecto educativo di conscientisacion tocante abuso y negligencia di mucha, desaroya pa señora Liliana Erasmus cu financiamento di Kiwanis Club of Aruba. A traves di e añanan, e proyecto a contribui na informa y orienta muchanan na Aruba tocante nan derecho na proteccion y respet pa nan curpa.

   Stacey Franca, trahador preventivo di Fundacion Respeta Mi, a splica cu e proyecto tin un trayectoria di varios aña, durante cual hopi mucha a cera conoci cu su mensahe. E aña aki, e fundacion ta duna e iniciativa un impulso nobo cu e lansamento di Panda Live Show.

   E historia, skirbi y ilustra pa Liliana Erasmus, ta enfoca riba proteccion di mucha y prevencion di abuso sexual infantil. Su mensahe central ta cu cada mucha tin derecho di sinti su mes sigur den su curpa, establece limite personal y exigi respet pa esakinan.

   Na 2015, Kiwanis Club of Aruba, den colaboracion cu Fundacion Respeta Mi, a contribui na presenta e storia pa medio di Kamishibay, un metodo visual di conta storia cu ta facilita comprension di mucha chikito. E material a wordo distribui na tur scol na Aruba y na diferente instancia, entre nan Biblioteca Nacional, cu e meta di alcansa mas tanto mucha y educador posibel.

   Ademas, durante su bishitanan na scol, Erasmus a comparti e storia directamente cu e muchanan, creando espacio pa pregunta y combersacion. E contactonan aki a permiti e autora observa nan reaccionnan, scucha nan y haya un miho bista di con nan ta ricibi y comprende e mensahe.

   E iniciativa ta ilustra con literatura y naracion visual por sirbi como instrumento pa educa, crea consciencia y facilita combersacion entre mucha y adulto tocante temanan delicado. E colaboracion entre e autora y e organizacionnan envolvi ta refleha un compromiso comun cu bienestar y proteccion di muchanan na Aruba.

   Franca a destaca cu, aunke e Fundacion Respeta Mi ta conta cu un ekipo di solamente dos persona, e ta sigui desaroya diferente proyecto pa informa y orienta mas tanto mucha y hoben posibel. Pa medio di e iniciativanan aki, e fundacion kier duna mas visibilidad na su labor y na e apoyo cu e ta ofrece.

   Cu Panda Live Show, Fundacion Respeta Mi ta keda construi riba e base di “Panda: No ta Mishi”, adaptando su mensahe pa alcansa un generacion nobo. E meta ta pa e muchanan reconoce nan limite personal y compronde cu nan curpa merece respet. Asina, e proyecto ta reafirma cu proteccion di mucha ta un responsabilidad di cada un di nos, cu ta cuminsa cu educacion, confianza y espacio pa scucha.