ORANJESTAD (AAN): Biblioteca Nacional Aruba ta continua cu programanan valioso pa promove Cultura di Aruba.
Diaranson, 21 di October 2026, di 6.30 pa 9.00 p.m. lo tin un programa dedica na Uitgeverij in de Knipscheer na Biblioteca Nacional Aruba, George Madurostraat 13, Oranjestad.
Astrid Britten y team di Biblioteca Nacional Aruba, Depertamento di Cultura Aruba y Gestor Cultural drs. Mirto Lacle ta orguyoso di por comparti actividadnan multicultural y multifacetico integra na e pueblo di Aruba.
E editor Franc Knipscheer di e cas editorial, Uitgeverij in de Knipscheer di Hulanda a duna autornan di Aruba un realse y a crea oportunidad y a publica obranan literario di diferente autor di Caribe, particularmente di autornan di Aruba, Bonaire y Corsou.
For di Hulanda lo ta presente drs. Ken Mangroelal cu a nace na Aruba. Ken Mangroela a skirbi diferente obra literario; prosa, poesia, ensayo y obra di teatro.
Lo duna reconocemento na Ken Mangroelal cu ta e persona clave cu a habri caminda pa publicacion di obranan literario di autoran di Caribe na Uitgeverij in de Knipscheer.
Lo duna reconocemento na Munye Oduber-Winklaar, autor di Aruba di cual su obra “Ta asina y awor mi ta regla cuenta cu bo” a keda publica na hulandes y na Papiamento pa Uitgeverij in de Knipscheer y Unoca.
DIARIO a compronde cu lo presenta un documental dedica na Franc Knipscheer produci pa Hester Jonkhout den cual autornan di Corsou ta expresa nan gratitude na Franc Knipscheer.
Lo tin charlanan cortico di dr. Wim Rutgers, dr. Michiel van Kempen y drs. Mirto Lacle. Grupo musical y Coro La Escala bou guia di Chichi Perez lo deleita publico presente cu nan canto.
Nos tin amor pa nos Lenga Materno Papiamento y nos ta sigui duna Papiamento un lugar prominente den Sociedad di Aruba y den exterior pa Papiamento por sigui existi pa semper den e siguiente generacionnan. Entrada pa e anochi aki ta gratis.
