Fundacion Pulso cu intercambio creativo entre Aruba y Colombia

E tabata exitoso!

ORANJESTAD (AAN): Den luna di april un grupo di tres artesano di Aruba a participa cu un programa di intercambio di conocemento cu Miranda y Popáyan, tur dos ta ciudadnan den departamento di Cauca na Colombia. E artesanonan local ta Señora Olga Londoño, Señora Fausta Luna y Señora Maria Elena Valecillos Jimenez.

   E tres artesanonan aki a worde acerca door di Fundacion Pulso, cu ta e organizacion cu ta encarga cu e programa di intercambio aki. Cu e programa aki, Fundacion Pulso tin como meta pa crea un plataforma entre e sector creativo di Aruba y den e caso aki esun di Colombia.

   Door di crea un netwerk solido entre Aruba y Colombia, por contribui na desaroyo sostenibel den mundo di arte pasobra e participantenan ta conecta cu comunidad artistico di otro pais y door di colaboracion por stimula desaroyo cerca tur dos comunidad.

  E artesanonan a participa na diferente tayer creativo, cual tabata haak cu hilo ‘guajiro’, traha cu klei, mosaico, felpa, traha popchi y joyas. Tambe a haya e oportunidad pa participa cu un tayer di arte culinario y un di danza folklorico. E tayer di haak cu hilo ‘guajiro’ a worde brinda door di e comunidad indigena “La Cilia La Calera”, cu tabata dispuesto pa comparti nan conocemento cu nos artesanonan y a ricibi nan cu man habri. 

   E artesanonan a worde ricibi calurosamente door di e comunidad artistico y tambe e alcaldenan di Miranda y Popȧyan cu ta masha contento cu e programa aki y cu lo kier wak e colaboracion aki sigui desaroya su mes den uno structural.

   Cu e conocimento y experiencia di Colombia, e artesanonan cu a participa cu e programa lo ofrece pronto par di tayernan gratis na nos comunidad y mini tayernan na tres scol basico. Na e manera aki, nan por transmiti e conocemento tambe na grandi y chikito cu e meta pa stimula hende pa desaroya nan arte y haci e conocemento aki accesibel na mas hopi hende posibel. Fundacion Pulso lo informa pronto mas detaye tocante e tayernan gratis pa nos comunidad.

   Fundacion Pulso kier gradici e artesanonan di Aruba cu a mustra un entusiasmo y dedicacion grandi pa cu e programa aki. Pa mas informacion tocante Fundacion Pulso por contact: This email address is being protected from spambots. You need JavaScript enabled to view it.

   E programa aki a worde haci posibel door di Fonds voor Cultuurparticipatie di Hulanda cu apoyo di e alcaldenan di e ciudadnan di Miranda y Popáyan. Nos ta contento tambe di por a ricibi sosten di consulado Colombiano na Aruba y consulado Hulandes na Colombia.