Graduacion di Rozeline Boekhoudt como Meester in de Rechten na Universidad di Aruba

Su master tesis ta hopi interesante

• Tesis encuanto violencia relacional contra muher na Aruba
• Aruba falta pa cumpli cu leynan internacional 

ORANJESTAD (AAN): E tabata un momento hopi alegre recien, ora cu Rozeline Boekhoudt a gradua na e Facultad di Ley di Universidad di Aruba.  DIARIO a compronde cu Rozeline a gradua defendiendo su master tesis titula: “Intimate Partner Violence Against Women On Aruba, A Human Rights Violation” (IPV).

   Rozeline a haci su investigacion basa riba e topico di “Violencia Relacional Contra Hende Muher” (IPV) na Aruba.

   Su investigacion tabata pa saca afo si Aruba ta tumando suficiente medidanan pa preveni y elimina “Violencia Relacional Contra Hende Muher”

   El a defende su master tesis dilanti e comision di graduacion cu a consisti di mr. dr. N. Chun Luk, mr. dr. Benedicta Deogratias, y PhD candidate Clementia Eugene.

   Pa medio di e investigacion aki, Rozeline kier a duna atencion na e situacion di Aruba relaciona cu “Violencia Relacional Contra Hende Muher”. E tesis ta ilustra e situacion actual na Aruba, unda tin di haber cu e medidanan di ley y aporte di e servicionan social pa e victimanan di “Violencia Relacional Contra Hende Muher”.

   E investigacion ta indica unda Aruba falta pa cumpli cu e leynan internacional pa por logra elimina y preveni “Violencia Relacional Contra Hende Muher”

   Un palabra di gratitud ta bay na: famia y sernan keri, e docentenan di Facultad di Ley, docente y e profesionalnan cu a guia Rozeline durante e proceso di su tesis.

   Esnan cu ta atende casonan di violencia contra hende muher, cu lo kier ricibi mas informacion tocante e investigacion aki, por tuma contacto cu Rozeline via e siguiente email:

This email address is being protected from spambots. You need JavaScript enabled to view it.

   Sigur hopi palabranan di pabien ta bay na Rozeline y henter famia.