Obra “Memoria Ancestral” tabata unico

Addonsito Croes:

ORANJESTAD (AAN): Recientemente e maestro- y artistanan di Arte, Laysmina Emerencia, Natusha Croes y Darwin Winklaar a presenta, pa un grupo di 30 persona den e mundo cultural y historico, e obra di teatro  “MEMORIA ANCESTRAL”. El a tuma luga den Cas di Cultura.

            Entre otro a trata e racismo y bullying cu cada un a pasa aden, sin lubida cu hopi di nos antepasadonan a forma parti di e sclavitud di Aruba, mas cu 160 aña pasa.

            Cu entre otro e habon blauw, e cabey afro y sclavitud den famia cu ta sinti nan mes hefe, e obra aki ta haya mas cu un voldoende!  Danki y pabien artistanan Layzmina Emerencia, Natusha Croes y Darwin Winklaar pa e invitacion pa ta parti dje produccion aki.

            E obra tabata unico, tremendo actua y presenta. Despues di e obra, e grupo presente por a expresa e impresion y  sentimento cu e obra a laga atras riba nan.

            Esaki ta, na mi opinion,  un bon forma pa educa e hubentud. Nieuwe Onderwijsvorm pa un materia asina importante, manera Historia (Geschiedenis),  pero cu hopi ta considera laf pa siña? Pabien Aruba su hoben educado- y  artistanan.