Fundacion Pa Nos Muchanan: Con pa siña muchanan chikito pasenshi

E ta duro pa un mucha warda, specialmente ora henter nan infancia nan a wordo carga ora nan yora,

duna cuminda mes ora, entretene, etc. Ora nan yega e edad di dreumes (1 aña) – ora nan cuminsa compronde – muchanan ta wordo puntra algo di nan cu ta completamente un concepto nobo pa nan: Pasenshi. Esaki por ta dificil pero importante. Siñando muchanan chikito con pa warda riba algo ta siña nan e importancia di pasenshi y ta forma nan den e tipo di adulto nan lo bira.

   Muchanan mester siña warda riba hopi cosnan, y pa hopi motibonan. Nan ta wordo puntra pa warda nan beurt pa hunga cu un co’i hunga. Nan ta wordo reta pa wanta nan pishi aden mientras e otro mucha ta caba di uza e wc. Y ta spera di nan cu nan ta warda te ora no tin auto pa crusa caminda. E ultimo ehempel por ta e les di mas grandi cu nan ta siña: warda pa mantene bo mes safe.

   E importancia di warda, specialmente ora e tin di haber cu seguridad

Pa muchanan chikito, e concepto di peliger y un posibel morto ta hopi abstracto, y un mayornan mester busca un manera pa ilustra e importancia pa warda prome cu crusa caminda of otro situacionnan peligroso, den un manera cu e mucha ta compronde. Expectativanan mester wordo duna na un mucha den un manera cu ta cla, consistente y apropia pa nan edad. Un ehempel: “Mientras nos ta warda pa crusa e caminda, locual mi ta spera di bo ta cu bo ta para leu for di e rand di e acera y wak tur dos banda di caminda dos biaha prome cu crusa.”

   Conecta e momento na algo cu un mucha por reconoce

Muchanan chikito no tin nocion di tempo ainda, pa e motibo aki, ora bo bi sa bo yiu, “mas oro” bo ta haya buscuchi of  “un djis nos ta bay hunga”. E no lo compronde cu e mester warda. Conecta e momento na algo cu e mucha por reconoce, por ehempel, ora bo caba di come cuminda e ora bo ta haya e buscuchi of ora mami caba di laba e tayonan e ora nos ta bay hunga. Loke si muchanan chikito ta reconoce ta e diferencia entre mainta y anochi (claridad y scuridad) Por uza esaki tambe pa indica e momento cu algo lo sosode, por ehempel, anochi bo por bisti bo pyjama nobo di spiderman. 

   No premia muchanan cu cosnan fisico

Ora ta trata pasenshi riba aspectonan cu no tin di haber cu peliger, mayornan por siña muchanan cu e acto di warda pa haci algo mes ta un recompense. Por ehempel, despues cu e mucha a haci limpi, e por bay hunga of haci cualkier otro actividad cu e kier, cual ta bira su recompensa. Mayornan no mester uza premiacion ora ta trata pasenshi. Ora bo elogia pasenshi, e ta crea confiansa den un mucha, pero ora bo agrega e expectativa di un recompensa fisico, esaki por crea consecuencianan. Ta bira un peliger ora bo cuminsa bisa bo yiu(nan) cu e lo ricibi un cupcake si e warda y sinta keto ora bo ta riba telefon. Ta bon pa semper pensa riba ki sorto di adulto bo kier bo yiu bira. Bo kier nan bira un adulto cu e ta spera un recompensa pa bon comportacion, of bo kier un adulto cu ta comporta na un bon manera pasobra e ta e cos corecto pa haci?

   Sea un ehempel

Tin pasenshi door di modela pasenshi tambe ta yuda hopi. Un mucha no ta bay tin pasenshi si nan ta wak nan mayor semper tin pura y ta haya stress ora tin rij largo. Mayornan cu kier nan yiunan tin pasenshi mester modela pasenshi tambe y splica nan y importancia di tin pasenshi.

Ora mester warda, esaki por ta un oportunidad pa mayornan y yiunan pasa tempo hunto ta haci cos pret. Si bo yiu tin dificultad pa warda y tin pasenshi, por puntra nan por ehempel pa bula 20 biaha of conta cuanto persona bisti den blauw tin.

   Fuente: https://www.fatherly.com/parenting/teaching-toddlers-preschoolers-patience-waiting/
Pa informacion of pregunta por acerca Fundacion Pa Nos Muchanan - Cumana 2