ORANJESTAD (AAN): Virusnan ta algun cu ta cambia tur dia. Pesey no por spera nada otro cu Covid-19 unda a resulta cu autoridadnan sanitario di e ciudad di Rosario, Argentina,
a raporta un caso nobo di ‘coronadengue’ Esaki ta un caso di infeccion simultaneo di Covid-19 y Dengue.
Aunke esaki ta e prome caso di coronavirus y dengue na 2022, no ta e prome di un persona cu ta wordo contagia cu ambos malesa na mesun momento.
Den e caso aki, ta trata di un muher cu a yega di vakantie for di Brasil y a presenta sintomanan manera fiebre y dolor muscular.
E muher a wordo someti na testnan di Covid-19 y a resulta positivo, y posteriormente, su cuadro clinico a mustra sintomanan di dengue, pa locual a detecta un infeccion simultaneo.
Segun e fuente, e pashent ta stabil y ta den bon condicion di salud.
Despues di e informe di e caso, e autoridadnan sanitario a adelanta campañanan di prevencion y comunicacion pa evita e propagacion di e casonan di dengue den e region.
E caso na Rosario no ta e prome cu a wordo raporta di un contagio di dengue y covid di manera simultaneo. Segun medionan local, na Januari 2021, na e provincia di Salta, na Argentina, a raporta 2 pashent cu covid y dengue pareu.
Tambe a wordo raporta casonan di personanan cu salmonella y covid-19. Otro paisnan manera Ecuador tambe a raporta casonan di infeccion simultaneo.
Segun e corant ‘El Clarín’, “coronadengue ta e padecimento simultaneo di e malesanan di coronavirus y dengue. Ta trata di un cuadro unda e pashent ta presenta ambos sintomatologia, loke ta representa un gran riesgo di mortalidad cerca esnan cu ta padece”.
E medio a señala cu, aunke ambos enfermedadnan ta diferente, esaki no ta elimina e posibilidad cu nan por presenta na mesun momento den e curpa di un persona.
Ta bon pa remarca cu ‘coronadengue’ (termino popular), no ta un mutacion ni un variante di covid-19. Al contrario, ta e condicion di expone y desaroya dos malesa pareu.
Segun expertonan, por facil confundi e sintomanan di dengue y covid-19, locual por complica e diagnostico di e dos malesanan di forma simultaneo.
Dengue, segun Organizacion Mundial de la Salud, ta un infeccion viral cu ta wordo transmiti na e humanonan debido na e pica di sangura infecta. E sanguranan Aedes aegypti ta e transmisornan principal di dengue.
Aunke hopi infeccion di dengue por ta leve, e cuadronan grave por presenta complicacionnan cu por causa e morto.
Organisacion Mundial di Salud ta señala c'un persona mester ta alerta pa posible dengue si ta presenta fiebre di 40 grado, acompaña di otro sintoma manera dolor di cabes intenso, dolor muscular y di joints, nausea, sacamento, agrandamento di e ganglionan linfatico y rash.
