Fundacion Museonan Arubano cu plan pa habri back pa publico

Plan presenta na Ministro di Cultura

ORANJESTAD (AAN): Recientemente Minister Maduro di Cultura a reuni cu sr. Renwick Heronimo di Fundacion Museonan Arubano (FMA) pa asina repasa e plan pa e cuater museonan cu ta cay bou encargo di FMA por habri back pa comunidad y bishitante.

   Ta trata di Museo Historico na Fort Zoutman na Playa, Museo Industrial, Community Museum y Euforia Carnival Exhibition na San Nicolas, cu ta habri nan portanan back pa ricibi bishita di nos localnan y tambe bishitante cu kier sa mas di Aruba su historia.

   Debi na e pandemia e museonan bou encargo di FMA a cera nan porta pa publico door cu FMA no por a sigui conta cu e fondonan cu turismo tabata genera y cu via ATA y APA tabata yega na e museonan.

   Tabata un situacion hopi dificil pa cual no tabata tin un solucion inmediato. Ministerio di Cultura di su parti a percura pa e coleccionnan por a worde bon cuida pa asina e museonan por a keda bon conserva te ora FMA por a yega na e fondonan necesario pa bay back den operacion. Awor den cooperacion cu e partnersnan di semper, ATA y APA, FMA ta logra pa cuminsa back cu e operacion di e cuater museonan.

   Durante e reunion Sr. Heronimo a duna un bista di e plannan pa e museonan pa e resto di aña 2023, y tambe pa locual lo bira e actividadnan pa añanan 2024 y 2025 pa e museonan. Ta cuminsa operacion di e museonan buscando personal y tambe voluntario pa yuda atende cu publico.

   Tambe lo traha riba e coleccionnan cu ainda mester worde exhibi pa nan tambe por yega na conocemento di nos localnan y bishitante. Pa e ultimo aki tambe ta masha importante pa FMA por conta cu e colaboracion di mas partners den comunidad cu kier cumpli cu nan deber civico aportando na bienestar di conservacion di e cultura di Aruba.

   Minister Maduro ta gradici y desea sr. Heronimo y tambe e hunta di directiva nobo di FMA hopi exito cu e ehecucion di e plannan pa e cuater museonan por habri nan portanan back pa comunidad y bishitante.