Staf y personal di Hilton Aruba Caribbean Resort a bisa ayo na e inventor di bebida Aruba Ariba

ORANJESTAD (AAN): Apenas luna pasa, a recorda e hecho cu 60 aña pasa e famoso bebida ‘Aruba Ariba’ a wordo crea na Aruba Caribbean Hotel, esta 1 Juli 1963. 

Bartender Juan Nicodemo Tromp, mihor conoci como Jocky ta e persona cu a crea e receta unico aki pa un ocasion special trahando na Aruba Caribbean Hotel, y su receta di bebida unico pa sobresali y ricibi reconocemento y distinccion pa su calidadnan durante varios aña.
   E receta original a worde crea riba e dia ey, 60 aña pasa, incluyendo vodka y rum blanco, combina cu Creme de Banana y Grand Marnier, pineapple juice, orange juice, lemon juice y stropi di grenadine.

   Ken por a pensa, cu un luna despues awor cu Juan Nicodemo Tromp a fayece y riba Diamars a wordo hiba na su ultimo lugar di sosiego.  Prome cu esey, e corteho funebre a pasa dilanti Hilton Aruba Caribbean Resort unda staf y personal a para pafo na su honor.

   Gerente general Lawrence ‘Larry’ Tuck y director di recursonan humano Glenn Farro a presenta un ofrenda floral sigui pa un minuut di silencio.  Despues e ruman muher Glenni Tromp a expresa su gradicimento na tur loke Hilton Aruba Caribbean Hotel a haci pa conmemora e 60 aña di existencia di e bebida.

   Na final, e empleadonan Thelma Franken y Melissa Kock a presenta cu e bebida famoso aki den man, pa asina honra Juan Nicodemo Tromp, e inventor di e bebida.  Gerencia y staf tur bisti den e Shirt special crea pa e ocasion di 60 aña di Aruba Ariba.