Minister Rocco Tjon ta señala cu:
ORANJESTAD (AAN) – Tocante e di cuater radar cu a wordo adkiri pa gobierno, pa eleva e sistema di seguridad na Aruba, Minister Rocco Tjon no a duna mucho detaye riba frecuencia y lugar di ubicacion, pasobra e no ta beneficioso pa e seguridad en general. Asina minister di Husticia y Asunto Social, a remarca, den conferencia di prensa, ora e pregunta a surgi.
E dignatario a indica cu gobierno ta traha cu companianan den exterior, cu ta experto riba e materia aki, y nan a entrega gobierno un rapport cu tur e diferente estudio cu nan a haci y a base di esey nan a scoge e lugar na unda e radar lo wordo instala. Esaki ta abarca e haltura cu e radar mester tin, su frecuencia, y demas dato.
E decision a wordo tuma teniendo cuenta cu tur e aspectonan aki, e mandatario a subraya. Minister Tjon a trece dilanti un punto cu e ta considera corecto y esaki ta:
“Bo tin tecnologia, capital humano, y maneho. Anto, a base di e tres factornan aki, ta trata di evita cu contrabando ta drenta Aruba. Cu e por ta 100% hermeticamente cera, obviamente nos ta haci tur nos esfuerzonan pa cu esaki, pero semper mi ta trece esaki pa dilanti: e paisnan cu tin e presupuesto di mas grandi, cu ta inverti hopi mas miyones cu nos ta inverti, tin contrabando ta drenta.
Nos no por tin e ilusion cu nos por elimina criminalidad por completo.
Absolutamente cu no! Pero mi ta kere si cu a base di e cifranan cu ta wordo presenta awe, entre otro, a base di e decisionnan di maneho cu nos ta tuma y e inversionnan den tecnologia den diferente proyecto, nos ta percura cu e balor agrega, pa loke ta entre otro, seguridad den nos frontera, ta bisto. Di e forma aki nos ta sigui traha pa nos eleva esaki.
Analisis haci ta demostra cu nos mester di un di cuater radar, y pesey nos a adkiri esaki tambe”, Minister Rocco Tjon, titula di Husticia y Asuntonan Social, a señala.
