Fundacion Movemento ta Bida a entrega certificado na 60 plussers

ORANJESTAD (AAN): Recientemente Fundacion Movemento ta Bida a tene un anochi di entregamento di certificado na esnan di edad 60 plus

cu a participa den un curso di percusion duna pa e experto maestro Vio Wester. Esaki a tuma lugar den aire liber di Lago Heights Club for di 6 pm pa 8.30 pm. Un total di 60 persona tabata presente ariba invitacion personal di cual un lista completo di nomber y tel ta den poder di FMTB. E presentenan tabata familiar of conoci di e participantenan.

Pa e entregamento di e certificado maestro Vio Wester a invita 5 musico, cu tabata, 2 trompet, 1 gitara, 1 bajo y 1 piano pa compaña e alumnonan. Un total di 5 cancion a worde toca na unda e musiconan tabata te patras di e podium y 4 rij di conga padilanti un tambor, un timbal y un maraca . Tur cu nan mondkapje bisti y ariba distancia di otro. Vio Wester mes tabata dirigi e grupo para abow y no ariba stage. E alumnonan cada un a haña opportunidad pa toka 1 of 2 cancion. Tambe Mighty Reds y Mighty Cisco a canta cada un nan calypso conoci pa duna e alumnonan mas animo pa keda train y toca nan instrumento favorito.

Un total di 11 participante a ricibi nan certificado for di man di Minister Xiomara Maduro cu a worde invita door di FMTB pa haci esaki.

E lesnan aki a worde duna den cuadro di e programa Hunto Grandi, Grandi Hunto di FMTB y a worde financia door di CEDE Aruba.

Tambe nos kier a gradici Tipico Palisia cu a duna un presentacion sublime despues cu un aña nan no a subi ariba e tarima. Tipico Palisia ta consisti di 6 entregante y 2 di nan tambe tabata partisipante di e curso di maestro Vio Wester y pesei a hanja e invitacion pa toca 4 cantica.

Caha di Orgel di Oslin Trimon tambe a deleita e publico cu algun cancion cu a cai masha na agrado di e pulico presente. E cursonan aki ta sigi aki 2 siman cu e segundo grupo y nan lo tuma lugar na Lago Heights Club cu ta colabora cu FMTB dunando nan club gratis pa e lesnan aki.

Si bo tin 60 plus aña y kier participa y por yama FMTB na tel 5868651. Tanto dama y cabayero por participa y e curso ta gratis.