ORANJESTAD (AAN) – Un lector a reacciona, tocante e articulo basa riba un opinion publico, relaciona cu e biento di Sahara,
y su consecuencianan pa hopi pais, y sigur e region di Caribe unda nos dushi Isla Aruba tambe ta situa.
Ta trata aki di e comentario di un persona cu ta gusta sembra mata den su cura di cas, di tur sorto y tambe ornamental. E di cu DIARIO cu e tin algun fruta y berdura (promenton, pampuna, lamunchi, spinashi) cu ta duna cosecha na nan tempo, pero tambe tin cierto matanan medicinal, manera hierba hole, oregano, menta y ademas matanan ornamental cu ta saca flor.
Den e ultimo lunanan unda cu e biento ta hopi fuerte, practicamente for di December aña pasa y e ultimo dos lunanan cu a biento a bira ainda mas fuerte (ya no por bisa cu ta biento di Siman Santo mas), algun di e matanan ornamental a seca por completo, mescos cu su mata di hierba hole cu tabata creciendo masha bunita mes.
E matanan aki, mescos cu e spinashi ta yena cu mancha blanco, y segun’e esaki ta bacteria, y posiblemente algun particula kimico cu manera un docter a bisa cu ta bin cu e biento di Sahara hunto cu e stof. Pues, esaki ta un situacion cu ta perhudica no solamente e salud di e ser humano, pero tambe di diferente planta. Awo cu tin mas campaña cu nunca pa cuida mas nos naturaleza, pa proteha e Planeta Tera, cu ta papia di Biodiversidad y cu tin dia internacional pa celebra cada cos di medio ambiente, ta ken por tin e solucion pa e dañonan causa pa e biento-stof di Sahara?
E ciudadano aki a papia cu diferente cunukero cu a aconsehe pa tapa su matanan mas vulnerable cu maya, anto pone estacanan diki pa wanta e cabuya di manera cu e matanan, por ehemplo esnan di remedi manera yerba di hole por haya solo, y alavez contene e stof di drenta daña e producto. Pero e ta depende si di e tipo di mata por haci esey. En todo caso, e tema di Sahara ta hopi bon y importante, y e lector tambe ta desea pa expertonan bin dilanti y informa pueblo si cada un ciudadano tin un manera pa evita of minimiza e dañonan di e stof.
