ORANJESTAD (AAN): E indice di “Cuminda & servicio di catering” a registra un subida di 0.3% na April 2021, despues di a baha pa seis luna consecutivo.
E indice di “Cuminda na cas” (0.5%) a registra un subida, unda 7 di e diesun indicenan di e gruponan di cuminda na cas a subi na April 2021.
E indice di “Batata, yuca y batata dushi” a conoce e subida di mas grandi (1.7%) na April 2021. E indicenan di “Carni” (1.2%), “Berdura” (0.8%), “Pan y otro productonan di grano” 0.6% y “Lechi, keshi y webo ” (0.5%) tambe a registra caida.
E indice di “Sucu, jam y otro tipo di cos dushi” (-0.5%) a registra e caida di mas grandi na April 2021.
Ademas, caidanan di -0.3%, -0.2% y -0.2% a worde registra den e indicenan di “Bebida no-alcoholico”, “Azeta y otro productonan traha di vet” y “Fruta”, respectivamente.
Den e ultimo diesdos lunanan e indice di “Cuminda & servicio di catering” a baha cu 1.6%. E indice di “Cuminda na cas” a conoce un caida di 2.5%.
E indice di “Batata, yuca y batata dushi” a baha cu 11.7%, e caida di mas grandi entre e gruponan di cuminda na cas, mientras cu e indice di “Sucu, jam y otro tipo di cos dushi” a subi cu 0.8%, e subida di mas grandi entre e gruponan di cuminda na cas.
E indice di “Cuminda pafo di cas” a baha cu 0.02% na April 2021 y a registra un subida di 0.5% den e ultimo 12 lunanan.
Na April 2021, “Cuminda na cas” y “Cuminda pafo di cas” como grupo, tabata tin un subida di prijs di 0.3% compara cu Maart 2021 y hunto tabata tin un influencia di 0.05 ppt riba e CPI, mientras cu e restante bienes y servicio hunto a experencia un caida di prijs di 0.1% y tabata tin un efecto di -0.07 ppt riba e CPI.
