ORANJESTAD (AAN): Parlamentario pa fraccion di MAS, señora Aquannette Gunn a entrega un serie di pregunta na Minister di Enseñansa y Deporte sr. Endy Croes relaciona cu Fundacion Lotto pa Deporte.
E preguntanan aki ta relaciona na expresionnan haci durante un evento 18 di juli ultimo, caminda e Minister a indica cu e Hunta di Supervision di fundacion lotto pa deporte a logra bolter e contract existente cu Canadian Bank Notes.
E mandatario a ratifica cu esaki lo ta algo benificioso pa Aruba. Sra Gunn a haci 5 pregunta na e Minister, den cual ta pidi e mandatario pa manda e supuesto contract cu a keda acorda entre Fundacion Lotto pa Deporte y Canadian Bank Note pa Parlamento. Tambe a pidi e Minister pa informa Parlamento kico concreto e renegociacion aki ta encera na beneficio di pais Aruba en general y na e deportistanan Arubano en particular.
A puntra Minister Croes si e renegociacion aki tabatin costo pa pais Aruba y of cualkier multa, y si ta asina di cuanto placa ta papia.
Parlamentario Gunn a dirigi no menos cu 6 pregunta na e mandatario relaciona cu e suspension di e director di Fundacion Lotto pa Deporte sr. Ronald Tuit. Ta desea pa sa e motibo cu e hunta di supervision a tuma dicho decision den luna di mei ultimo. "Mas cu cuater luna a transcuri y no tin un bista concreto di e decision di e Hunta di Supervision pa cu dicho suspension, mientrastanto e Hunta a apunta sr. Dominico Figaroa temporalmente na cabes di dicho Fundacion, encarga cu e maneho diario".
Ta desea di sa for di Minister si e Hunta di Supervision a termina cu e investigacion contra sr. Tuit y si esaki tabatin suficiente base pa termina e contract, of si mester a yega na acuerdo monetario cu sr. Tuit pa termina e relacion laboral.
E parlamentario pa fraccion di MAS a termina bisando di ta spera cu Minister Endy Croes lo por contesta e serie di pregunta cu a keda haci na su persona for di dia 24 di juni, esnan entrega dia 12 di augustus y esunnan di dia 16 di augustus, relaciona cu Fundacion Lotto pa Deporte.
