Fundacion FADA hopi contento cu Polis a cuminza controla bendemento di ‘Vape’

ORANJESTAD (AAN): Manera a bira conoci, Polis di Bario Santa Cruz conhuntamente Polis di departamento di Permiso (SBV)

y Polis Uniforma a cuminsa cu un proyecto pa cu control y concientisacion pa cu benta di “vape”.

   Mirando e situacion y problema pa cu salud bao di nos hobennan, a dicidi na cuminza e proyecto aki. Y e meta principal ta pa conscientisa e comerciantenan pa loke ta trata e benta di e producto Vape. Pa ley ta prohibi pa bende un hoben bao di 21 aña Vape. Tambe prohibi pa un hoben bao di 21 aña huma Vape

   Polis di Bario a acerca Fundacion FADA tambe riba e asunto aki.  Aki ta unda cu Rulienne Arends di FADA a expresa su satisfaccion cu nan a wordo envolvi pa duna informacion riba e control aki.

   Polis a tuma tur e yamada di scolnan na serio!  Cabezantenan ta yama cu man na cabez pa e preocupacion rond di e trend cu nan ta haya alumnonan cu e.o. Vape-pens den nan poder.

   FADA mesora a sinta hunto cu Polis y tambe Departamento di DVG pa intercambia informacion di loke nan ta topa cu ne diariamente, y tambe a brainstorm riba ki accion por  tuma.

   Asina a bin cu e accion cu a start e ultimo fin di siman, pa bishita negoshinan cu ta bende e productonan di Vape.

   E grupo di Polis cu FADA y DVG a keda recorda comerciantenan pa nan corda loke ta e consecuencia pa bende Vape cu hoben bao di 21 aña.  A splica y avisa e comerciante loke ta e parti di boet como tambe a enfatisa e pakico no ta permiti bende na menor como tambe hoben bao di 21 aña di edad y cu hobennan aki tampoco no por usa Vape.

  A tuma nota cu Vape ta un trend nobo bao di e hobennan. Durante charlanan duna na diferente scolnan por a ripara cu e tematica aki ta keda bin dilanti y na unda ta bin haya hobennan cu e Vape den nan poder. 

   KPA, DVG y FADA ta haci nan esfuerso riba e area di prevencion pa concientisa e hobennan durante charlanan na scol kico ta e consecuencia cu Vape tin pa nan salud.