Diahuebs anochi pa Diabierna mainta...
ORANJESTAD (AAN): Un situacion di un kabel bao tera, a trece disgusto enorme cerca ciudadanonan cu net ta preparando pa bay drumi. Coriente a cay afo pa area di Madiki, Eagle, Socotoro, y Playa Pabao. Esaki a socede Diahuebs alrededor di 10:00 pm.
Mesora monton di yamada a drenta na Storingsdienst di NV Elmar, pero nan sistema automatiza tambe a duna nan un bista di loke ta pasando y cu un area grandi diripiente a bira scur. Mas bien casi tur cas cu ta conecta riba Sub-Station di Paardenbaai.
Temperatura riba Aruba den e anochi di Diahuebs pa Diabierna tabata como 26º Celsius. Y pa hopi hende esey ta un temperatura dificil pa drumi cu ne.
Personal di NV Elmar a subi caya buscando pa localiza e fuente di e fayo enorme aki. A base di experiencia, a bay detecta cu ta un kabel bao tera a cay afo, y esaki a benta varios bario for di e grid di coriente.
Tecniconan e ora sa cual parti di e grid nan por bay ‘isola’, y asina duna e otro barionan cu ta mas leu coriente bek. Esaki a socede banda di 10:54 pm y un parti grandi di clientenan a haya coriente bek.
Sinembargo e problema di kabel subteraneo tin di wordo resolvi, y busca mas personal. Como cu esaki ta mas dificil, y tin di bay midi e kabel y tur cos.
Personal di NV Elmar a keda henter marduga ta trahando riba e problema, y e momento ey ta solamente e area direct rond di e kabel a keda sin coriente.
Esaki a pone cu banda di 2’or di marduga pa 4’or di marduga mester a bay coba bao tera pa yega na e kabel cu a ocasiona e problema. Pues e trabao di reparacion a inclui excavacion pa por drecha e kabel, pone kabel nobo, y conecta e pida nobo cu esun existente.
E trabao a finaliza, y porfin pa 6:00 am coriente a bin bek den e area ey tambe. Excepto di Italiestraat #10. Parti di e trabao a sigui keto bay.
Banda di 10:00 am, pues despues di 12 ora ainda tabata haciendo trabao final.
Finalmente te pa 11:58 am, tur cliente a haya coriente bek. Pues tabatin algun cu a keda como 14 ora sin coriente.
