Fundacion Educar pa Transformar ta hiba formacion y bienestar na CasMarie

ORANJESTAD (AAN): Cu e proposito pa transforma conocemento den un herment pa sirbi comunidad,

Fundacion Educar pa Transformar a realisa diasabra 8 di augustus un actividad social na CasMarie, caminda un grupo di participantenan y voluntarionan a ofrece facial gratis pa e clientenan di e centro.

E actividad tabata un oportunidad pa e voluntarionan pone na practica e conocementonan y habilidadnan cu nan a ricibi durante nan proceso di formacion, mientras cu nan tabata brinda e clientenan un momento di cuido, relaxacion y bienestar.

   Mas cu solamente e tratamentonan facial, e momento tabata yena di sonrisa, conversacion y momento di cercania. Pa e voluntarionan, e actividad tabata tambe un experiencia importante, pasobra nan por a mira di cerca con un habilidad cu nan a siña por bira un manera concreto pa aporta na bienestar di otro hende.

Pa Fundacion Educar pa Transformar, actividadnan manera esaki ta forma parti di un vision di educacion cu ta bay mas leu cu solamente siña conocementonan tecnico. E fundacion kier cu hende por desaroya habilidadnan cu ta permiti nan crea oportunidadnan, prepara nan mes pa genera entrada y na mes momento, contribui positivamente na nan comunidad.

   “Nos ta kere cu educacion tin un impacto mucho mas grandi ora loke nos siña tambe nos ta pone na servicio di otro hende. E actividad aki a duna nos voluntarionan e oportunidad pa comparti nan conocemento, gana experiencia y principalmente sinti e balor di sirbi comunidad,” a expresa un miembro di directiva di Fundacion Educar pa Transformar.

   Fundacion Educar pa Transformar ta expresa su danki special na CasMarie pa habri nan porta y haci e actividad aki posibel y tambe na tur e participantenan y voluntarionan cu a dedica nan tempo, conocemento y energia pa haci e momento aki un realidad.

   E iniciativa aki ta un refleho di e compromiso di Fundacion Educar pa Transformar pa sigui crea espacio caminda formacion, servicio na comunidad y desaroyo personal y profesional por bay man den man.

   Como parti di su compromiso pa sigui ofreciendo oportunidadnan di desaroyo y formacion, Fundacion Educar pa Transformar ta anuncia cu e proximo cursonan gratis ta cuminsa dia 9 di september 2026. Entre e cursonan cu ta ofrece tin Masahe Relahante, Facial Basico y Emprendemento, entre otro.

   Esnan interesa pa participa y amplia nan conocementonan por registra via e website di Fundacion Educar pa Transformar: www.fundacionfet.org, of contact e fundacion via WhatsApp na 641-2966. E cursonan ta gratis y ta forma parti di e esfuerso di e fundacion pa crea mas oportunidadnan pa hende den comunidad por siña, desaroya nan habilidadnan y transforma nan conocemento den oportunidadnan pa nan futuro.