Fundacion BEULAH mes lo cuminza brinda servicio di Ombudsman na pueblo

Nan mes ta lanza nan oficina di Ombudsman

ORANJESTAD (AAN): Ombudsman y Kinderombudsman ta e defendornan independiente di pueblo contra actonan inhusto di Gobierno. Esey ta e mission di un Ombudsman.

   Y mescos cu pueblo Hulandes a haci na añanan 1980, Aruba no ta bay sinta warda riba e Gobierno di Coalicion ni e Parlamentarionan mas pa logra defende pueblo di berdad cu esey. 

   Pesey mes, Fundacion BEULAH ta bay lanta su mesun Oficina di Ombudsman. Un oficina cu lo brinda servicio y conseho huridico gratis na pueblo, manera ta worde ofrece na tur pais den Reino, menos Aruba. Aruba ta e unico pais den Reino cu NO tin un Ombudsman y esey ta laga nos democracia keda un palabra bashi. 

   Dos aña y 3 luna despues cu Parlamento a aproba e Ley di Ombudsman no a apunta un Ombudsman. Cua negoshi, instituto of pais ta tarda mas cu dos aña pa apunta un persona den un funcion?

   Den un entrevista cu Giselle Sint Jago, el a splica cu St. Maarten mes cu ta un pais cu a haya nan Status Aparte 24 aña despues di Aruba, ya por conta cu un Ombudsman 12 aña caba.

   Curaçao y tur tres Islanan BES ta haya proteccion di nan propio  Ombudsman of di e Nationale Ombudsman y Kinderombudsman di Hulanda. 

   Un oficina di Ombudsman por asisti pueblo cu e ayudo necesario prome cu e mester bay corte. Servicio di skirbi carta di keho, ‘bezwaarschrift’ of pa sinta hunto na mesa cu ambos partido pa ofrece mediacion y soluciona e caso asina. 

   Fundacion BEULAH ta contento cu Universidad di Aruba a habri un Tienda di Ley. No tin limite na cuanto ayudo pueblo lo mester por haya. Sinembargo, Fundacion BEULAH su intencion ta pa brinda servicio huridico tur dia, informa pueblo di su derechonan, duna curso, crea un corant online cu ta brinda informacion di actividadnan di otro fundacionnan na pueblo gratis y organiza charla cu oradornan local y internacional. 

   Fundacion BEULAH lo cuminsa back tambe cu su programanan di television. Su propio channel di onlinetelevision, pa pone lus riba tur caso y no solamente riba esnan preselecta. Un Channel di Pueblo pa Pueblo. 

  Esey ta e regalo di Sinterklaas di 2022 cu Stichting BEULAH ta duna pueblo.