Prome Minister ta kere cu ta importante pa mira y scucha personalmente e preocupacionnan cu tin na Arubahuis

Reunion cu Minister Plenipotenciario, Directora Interino y trahadonan 

ORANJESTAD (AAN):  Prome Minister Evelyn Wever-Croes durante su bishita di trabou na Hulanda, diabierna ultimo a bishita Arubahuis pa asina reuni cu Minister Plenipotenciario señor Ady Thijsen, directora interino señora Glenda Hernandes y combersa cu e trahadonan. “Ta hopi importante na momento cu mi ta na Hulanda pa bishita Arubahuis pa mi por mira y scucha personalmente e preocupacionnan cu tin”, Prome Minister a expresa.

            Arubahuis ta haciendo un trabou importante pa Aruba y por a nota cu e ta mas accesibel pa e Arubianonan cu ta biba na Hulanda. P’esey ta importante pa sa kico ta e areanan cu nan ta trahando riba dje, pa yuda tur esnan cu ta bibando, studiando of a bay Hulanda cu un proposito medico.

            Prome Minister a expresa cu e asistencia brinda na su persona y demas ministernan durante nan bishita na Hulanda ta uno di aplaudi, y cu e tin tur confiansa cu e trabounan ta wordo haci na e miho manera y cada bes mehorando riba cada tereno.

            Tambe Prome Minister a splica cu durante su bishita di trabou na Hulanda, hunto cu Minister Plenipotenciario a logra haci diferente bishita, y p’esey ta importante pa nan reuni y papia riba tur e bishitanan haci, pa wak con lo sigui atende cu e relacionnan, cu ta hopi importante pa pais Aruba.

            Prome Minister a indica cu e reunionnan tabata positivo na unda por a nota cu Minister Plenipotenciario ta haciendo un bon trabou den habri portanan y crea brugnan necesario entre Aruba y Hulanda. Esaki sigur ta facilita e trabou di e ministernan na momento cu nan bishita Hulanda pa reunionnan na unda nan por yega Hulanda reuni y haci palabracionnan concreto.   

          “Unabes cu mi regresa Aruba mi lo repasa tur e logronan durante e siman di reunion na Hulanda pa asina sigui traha riba proyectonan cu Aruba kier encamina”, Prome Minister a duna di conoce.