Comerciante Marjorie Vermeer:
ORANJESTAD (AAN) – E comerciante señora Marjorie Vermeer a expresa den un entrevista, cu e adictonan ambulante semper tabata y ta un problema den Caya Grandi.
E mes tabata vocero di Fundacion Maneho Adiccion Aruba, cu nunca a haya su debido atencion. Comunidad ta wak e adictonan aki comosifuera ta personanan cu tin un problema social, pero no ta asina. E ta un problema di salud, e ta un malesa, segun Vermeer. Pero te awo Minister di Salud Publico na Aruba, no ta mira adiccion como un malesa. Ningun hende kier bira adicto, pero esaki ta algo cu por wak tur parti di mundo. Un circunstancia di bida, Vermeer ta indica.
E dama a expresa cu ora un persona ta haya cancer, e ta bay hospital y e ta wordo atendi pa docter y un oncology afdeling hopi grandi, pa zorg pa e persona, y hasta por mande Colombia; pero si un mucha di 13 aña ta adicto, su mayornan no tin ni un caminda pa hibe pa haya wordo trata.
“No tin nada pa e mucha. Gewoon lague wak con e ta haci”, Marjorie Vermeer a bisa. “Ta responsabilidad di pueblo pa cuida su enfermonan. Pero un adiccion no ta wordo mira como un malesa”, el a agrega. “Bo ta coi e malesa ey y ta hinke bao AZV pa e paga pe y opname e mucha”, Vermeer a subraya. E ta bisa cu mester laga tur e lugarnan cu ta traha cu adicto ta priva y independiente. Laga tur e hendenan specializa aki y paga nan pa cura nos pueblo di adiccion. “No tin e sabiduria, el a wordo presenta mil biaha pero nos Minister Dangui no ta wak esey”, el a añadi.
