Fundacion Autismo sumamente orguyoso di e logro di Byron

Special Olympics

ORANJESTAD (AAN): Den fin di siman cu un avion di jetBlue, e atletanan di Aruba cu a participa na Special Olympics na Orlando (Florida), a regresa cu hopi animo y contento di nan logro.

    Cuerpo di Bombero tabata riba pista pa asina spuit e avion cu awa como un honor extra special na e atletanan crioyo.

   Un publico grandi tabata presente den edificio di Yegada pa asina duna tur e hobennan un bon bini.

   Un di esnan wardando anciosamente riba e atletanan tabata señora Carolina Thiel-Span di Fundacion Autismo Aruba.  El a splica cu nan mes ta sumamente emociona y contento cu e hoben Byron Lesire a logra asina hopi ganando 2 medaya den Bowling.

   Byron tin mas di un aña cu e ta Embahador di e Fundacion, y su meta di hopi tempo tabata di por a bay representa Aruba internacionalmente den Deporte, y el a haya chens di haci esaki den Bowling.

   Tabata contento pa mira cu el a representa Aruba bon, y a bin cu dos medaya di Plata.  A ricibi bon cooperacion di Aeropuerto y di Cuerpo di Bombero.

   Nan ta contento cu tin mas atleta di Aruba cu a haya medaya tambe na e Special Olympics 2022 y esaki ta un empuhe sigur pa e isla su nomber keda na halto.

   Byron como hoben autista, a demostra cu danki na hopi guia y training, e ta yega hopi leu!  DIARIO ta felicita Byron y su mama Raquel tambe cu e bunita logro aki.

   Na Aeropuerto a mira presencia di Ministro di Enseñanza y Deporte cu a duna tur e atletanan un bon bini.