Ministro djis a faya!
ORANJESTAD (AAN): Dia 10 di Juni 2022 a sali den prensa, un reaccion di Ministro encarga cu DIMAS, kende a bisa cu ainda e no por duna comentario riba sentencia di Huez den caso cu e Directora a entabla contra dje, pasobra e ta bay warda e resultado di e “caso den bodemprocedure”.
Sinembargo e sentencia di Huez ta asina duidelijk cu Ministro tin di compronde cu el a faya masha mahos mes. Esey ta: Un Landsveroderning hamas y nunca por wordo cambia y/of hala un banda cu un simple Decreto Ministerial.
E simple Decreto Ministerial ey hamas por tin forza riba un Ley (Landsverordening) cu tin firma di Gobernador riba dje, pa purba kita e Directora for di e puesto di DIMAS.
Loke varios observador di ley ta haya un tiki di lamenta, ta cu despues di e Sentencia di Huez, ta tur Sindicato cu ta atende funcionarionan di Gobierno “a keda keto”.
Loke Ministro a haci malo: Si acaso Ministro no a gusta e forma di traha di Kathy Paskel, e mester por sa cu e decision aki tin di socede na nivel di ley (Landsbesluit), y cu su Decreto Ministerial (“M.B.”) no tin forza at all den esey. Esey hamas por, pues e Ministro ta mal perdi eynan.
Kico por spera den e Bodemprocedure? Casi mesun cos! Huez lo bolbe mustra cu e Decreto Ministerial hamas tin mas forza cu un Landsverordening, y pues Huez lo dicta cu e tin di laga Kathy Paskel bay bek na e puesto.
Huez lo no a bay riba inhoud di e caso, sino ta bay riba e aspecto di ley. Esey ta tur e cos den e caso di corte di Prome Instancia, y tambe lo bay bisa esey den Bodemprocedure.
A nota cu a ser bisa, cu Huez a suspende e decision di Ministro tambe! Esey nifica cu door di e suspension di e decision, esey nifica cu e Management Team den DIMAS aworaki no por traha tampoco. Door di Huez, e beschikking a caduca y Management Team ta wordo poni mas patras riba e stoof cu candela paga y no por funciona. Nan trabao a bira nulo debi cu e schors e besluit di Ministro.
Sindicatonan a keda keto: Observadornan ta keda haya hopi raro cu Sindicatonan a keda keto. Pasobra loke e Ministro a dicidi, ta pone cu el a haci e rechtspositie di tur Ambtenaar den peligro cu djis un Decreto Ministeria. Sindicatonan mester a lanta, no djis pa defende e Directora, sino pa e Ambtenaar cu den futuro e no por bira victima di algo asina.
Danki Dios na e Constitucion di Aruba, cu tin un Gobernador cu ta unico encarga cu firmamento di Landsverordening (LMA), y cu Ministro mester siña su les cu hamas e por ta mas halto cu un Gobernador.
E tin di compronde cu Departamento di DIMAS a wordo crea cu un Landsverordening, y cu Kathy Paskel tambe a wordo nombra via di Landsbesluit. Cualkier cambio cu un Ministro kier haci eynan, e tin di ser haci via un Landsbesluit. Ministro por haci un voordracht pa cierto hende bira Director, y na final di dia ta e Gobernador ta nombra e persona, conforme ley.
Tin di corda cu den pasado, e Gobierno anterior a yega di trata di haci algo similar cu Directora di DPO. Nan kier a hale un banda cu e mesun wega aki. Pero Huez a bari esey for di mesa, como cu un Decreto Ministerial no tin mas poder cu un Landsverodening. Pues nan a haya nan obliga di pone e Director bek na su asiento.
Kizas a bira tempo pa Ministro su conseheronan tuma un tiki bijles di loke Landsverodening por, y e limitenan di Decreto Ministerial.
