Fundacion a yuda cu e ultimo deseo di un ciudadano

Fundashon Ultimo Deseo Aruba ta cumpli

ORANJESTAD (AAN): Riba Diasabra siman pasa, e organizacion local di Fundashon Ultimo Deseo Aruba, a cumpli cu e ultimo deseo di un ciudadano, y cune a bay nabega a lo largo di e costa di Aruba, hunto cu algun miembro di famia.

   Tempo e tabata hoben, Roberto Boekhoudt regularmente tabata sali bay pisca mainta trempan cu su e boto chikito di su amigonan cu tabata un boto di 13 pia.

   Roberto a conta cu hasta un biaha el a yega costa di Venezuela cu su amigonan. Pa Roberto esaki tabata e causa di su deseo di pasa band’i costa di Aruba pa ultimo biaha y kisas coy un pisca.

   Hunto cu su famia, riba Diasabra 1 di maart 2025 Fundashon Ultimo Deseo Aruba (FUDA) a busca Roberto cu un ambulance di Faith & Hope. Unabes abordo a start e motornan. Lamentablemente e piscanan grandi no kier a morde e hanzue.

   Sin embargo, tabata bisto cu Roberto cu su famia a gosa di e dushi atardi aki riba lama. Prome cu ambulance a hib’e bek, a para un rato na Mangel Halto, na Pos Chikito, pa disfruta di e panorama y saca algun potret.

   Esaki tur a bira un recuerdo bunita, ya cu su mañan e Presidente di FUDA a haya e triste noticia cu Roberto Boekhoudt a fayece dia 2 di maart 2025. E tabatin 65 aña.  Palabranan di forza na tur famia y amigo di Roberto.

   Pesey awor Fundashon Ultimo Deseo tey pa asina cumpli cu deseonan di hendenan rond Aruba.  Pues pa tur hende sa cu e Fundacion aki ta existi, y cu gratuitamente nan ta yuda cumpli cu deseo pa personanan cu ta terminal of drumi riba cama.

   E Fundacion a lanta special pa cumpli cu ultimo deseo di hendenan riba Aruba.  Bo por bay riba e website di fuda-aruba.com pa bo haya e formulario di deseo pa bo yena.  Si acaso bo tin pregunta of mester di yudansa pa yena e formulario, por contact Fundashon Ultimo Deseo Aruba yamando na telefon 732-7373.  Cu hopi gusto nan lo yudabo.