Alumnonan di Ciclo Basico di La Salle College bay yuda haci costa limpi  

ORANJESTAD (AAN): Algun siman pasa, e alumnonan di La Salle College MAVO a pone man na obra, pa asina coopera cu comunidad di e isla.

   Tur e alumnonan di Ciclo Basico-1 a participa den un Beach Cleaning, cu a wordo teni for di Westpunt bay te cu ‘Sasarawichi Dunes’.

   E muchanan aki di berdad a sa di recoge monton di sushi.  E lidernan di scol a informa cu e alumnonan aki tabata hopi balente, no tabatin ningun miedo di cana na oriya, mey-mey di e matanan, y a sa di recoge delaster sushi cu nan a topa cune.

   E recogemento di sushi tabata asina bon, cu na final nan a yena un total di 4 Pickup yen yen cu saco di sushi.

   E alumnonan na final a ricibi delicioso treat di patia y tambe bacoba.