ORANJESTAD (AAN): Diahuebs ultimo Prome Minister Evelyn Wever-Croes tabata den Parlamento pa trata presupuesto 2025 pa Raad van Advies (RvA).
RvA ta un colegio halto di estado cu ta duna conseho na Gobierno y Parlamento riba leynan cu Gobierno kier implementa. Tambe nan por duna conseho sin worde pidi riba maneho of otro tipo di asuntonan.
Prome Minister a indica cu e presupuesto a worde aproba cu 19 voto na fabor, mirando cu 2 Parlamentario a opta pa abstene. Esaki sigur ta mustra cu mayoria den Parlamento ta sostene e presupuesto y tin confianza den e maneho di RvA.
E mandatario a splica cu na momento cu el a drenta gobernacion como Prome Minister di Aruba, el a traha hopi duro pa independisa RvA. Pa por logra esaki el a institui e commissie versterking democratisch bestel di cual señor Ari Swaen y señora Helen van der Wal tabata parti. Danki na tur nan trabao duro RvA a worde independisa y awe ta un organizacion hopi mas profesionalisa cu ta duna un calidad halto di conseho na Gobierno y na Parlamento. Tambe e instituto aki ta hiba nan mesun maneho cual ta duna nan e flexibilidad pa mantene nan trahado y profesionalnan mas tanto cu ta posibel ya cu nan mes tin control riba p.e. salario di e personal.
Durante e reunion den Parlamento tambe a bin e tema di screening dilanti cu ta relaciona cu RvA. Manera ta conoci desde 2021 e ley di screening a bin na vigor y pa cu esaki e presidente di RvA tin un rol importante den dicho proceso. E presidente di RvA ta esun encarga pa screen e formadornan pa wak si nan por ta candidato apto pa bira minister. Den cuadro di esaki a bin varios pregunta manera con e proceso ta bay, con ta haci cu e gastonan envolvi, y kico lo pasa en caso tin casonan di conflicto di interes entre e persona cu ta encarga cu e screening y e candidato.
Prome Minister a indica cu e proceso di screening ta un responsbilidad hopi grandi y tin confianza cu esun cu ta eherece esaki por atende cu puntonan delicado manera conflicto di interes. Tambe Prome Minister a conseha Parlamento cu den caso di cualkier duda of inkietud, nan lo mester cuestiona e persona envolvi mirando cu Gobierno no tin nada di haber cu e screening.
Ta importante si pa enfatisa cu e proceso di screening no ta importante pa e candidatonan envolvi so sino pa comunidad completo, paso unabes e persona pasa e screening, comunidad por ta trankil cu e integridad di e persona no ta worde cuestiona. Esnan encarga mester studia tur informacion pa asina por informa si e candidato ta integro suficiente "boven iedere twijfel verheven" pa bira minister.
