Funcionarionnan Hulandes di fondo di restauracion a bay mira progreso di Cas Veneranda

ORANJESTAD (AAN): Siman pasa, Ministro Geoffrey Wever huto cu un delegacion consistiendo di entre otro Sr. Ugur Özcan CEO Nationaal Restauratiefonds,

Sr. Coen Reinders CFO bij Nationaal Restauratiefonds, Sr. Matthijs van Beusekom Senior beleidsmedewerker VNO y otro representantenan di Stichting Monumentenfonds Aruba,a ricibi un recorido extenso for di Sra. Anne Witsenburg director di Stichting Monumentenfonds Aruba na Cas Veneranda.

   Esaki ta e edificio cu ta bao renobacion den Wilhelminastraat na Playa.  Conoci antes como e sede di Papiamento Restaurant.

   Tur esnan cu a bay, a haya un bista total di con e proyecto ta kedando despues di un proceso di renobacion. E proyecto cu ta uno fundamental den e vision pa revitalisa centro di Oranjestad ta prueba palpabel di e seriedad di e gabinete aki pa logra e meta di revitalisacion urbano.

   Pronto lo anuncia e fecha di reapertura di Cas Veneranda completamente restaura na comunidad.